നാലു വയസ്സിനു താഴെയുള്ള കുട്ടികൾക്ക് നൽകുന്ന ചില ചുമ, ജലദോഷ മരുന്ന് സംയുക്തങ്ങൾ നിർമ്മിക്കുന്നതിനും വിൽക്കുന്നതിനും വിതരണം ചെയ്യുന്നതിനും കേന്ദ്ര ആരോഗ്യ മന്ത്രാലയം കർശന വിലക്കേർപ്പെടുത്തി. ക്ലോർഫൈനിറാമിൻ മാലേറ്റ് (Chlorpheniramine Maleate), ഫിനൈലഫ്രീൻ ഹൈഡ്രോക്ലോറൈഡ് (Phenylephrine Hydrochloride) എന്നിവ അടങ്ങിയ ഔഷധക്കൂട്ടുകൾ കുട്ടികളുടെ ആരോഗ്യത്തിന് ഭീഷണിയാണെന്ന് കണ്ടെത്തിയതിനെത്തുടർന്നാണ് ഈ നടപടി.
മുതിർന്നവർക്കായി ഉൽപ്പാദിപ്പിക്കുന്ന ഇത്തരം മരുന്നുകളുടെ ലേബലുകളിലും വിവരപ്പത്രങ്ങളിലും ‘നാല് വയസ്സിൽ താഴെയുള്ള കുട്ടികൾക്ക് നൽകരുത്’ എന്ന് വ്യക്തമായി രേഖപ്പെടുത്തണമെന്ന് കേന്ദ്ര സർക്കാർ നിർദ്ദേശിച്ചിട്ടുണ്ട്. നിലവിൽ കുട്ടികളിലെ രോഗലക്ഷണങ്ങൾക്ക് സുരക്ഷിതമായ മറ്റു ബദൽ മരുന്നുകൾ ലഭ്യമാണെന്നും അധികൃതർ അറിയിച്ചു.
നേരത്തെ ഏപ്രിൽ മാസത്തിൽ ചില സംയുക്തങ്ങൾക്ക് നിയന്ത്രണമേർപ്പെടുത്തിയിരുന്നെങ്കിലും, വിദഗ്ധ സമിതിയുടെയും ഡ്രഗ്സ് ടെക്നിക്കൽ അഡ്വൈസറി ബോർഡിന്റെയും ശുപാർശകളെ തുടർന്ന് ഇത് കൂടുതൽ വിപുലമാക്കുകയായിരുന്നു. പൊതുജനാരോഗ്യം മുൻനിർത്തി ഔഷധ നിയമത്തിലെ സെക്ഷൻ 26 എ പ്രകാരമാണ് നിലവിൽ ഉത്തരവിറക്കിയിരിക്കുന്നത്. രാജ്യത്ത് കുട്ടികളുടെ ചുമമരുന്ന് ഉപയോഗം മൂലം ജീവഹാനി വരെ റിപ്പോർട്ട് ചെയ്യപ്പെട്ട സാഹചര്യത്തിലാണ് കേന്ദ്രം നിയന്ത്രണ നടപടികൾ ശക്തമാക്കിയത്.
