ഓണക്കാലത്ത് പ്രേക്ഷകർ വലിയ പ്രതീക്ഷയോടെ കാത്തിരുന്ന ‘ബെത്‌ലഹേം കുടുംബ യൂണിറ്റ്’ തികഞ്ഞൊരു ക്ലീൻ എന്റർടെയ്നറായി മാറിയിരിക്കുകയാണ്. ‘പ്രേമലു’വിന്റെ വൻ വിജയത്തിന് ശേഷം ഫഹദ് ഫാസിൽ, ദിലീഷ് പോത്തൻ, ശ്യാം പുഷ്‌കരൻ എന്നിവരുടെ ഭാവന സ്റ്റുഡിയോസ് നിർമിക്കുന്ന ഈ ചിത്രത്തിൽ നിവിൻ പോളിയും മമിത ബൈജുവുമാണ് കേന്ദ്ര കഥാപാത്രങ്ങളെ അവതരിപ്പിക്കുന്നത്. ഭാവന സ്റ്റുഡിയോസും നിവിൻ പോളിയും ആദ്യമായി ഒന്നിക്കുന്നു എന്നതിനൊപ്പം, ഗിരീഷ് എ.ഡി – മമിത കൂട്ടുകെട്ട് വീണ്ടും ഒരുമിക്കുന്നു എന്ന പ്രത്യേകതയും ഈ സിനിമയ്ക്കുണ്ട്.
‘തണ്ണീർ മത്തൻ ദിനങ്ങൾ’, ‘പ്രേമലു’ തുടങ്ങിയ സൂപ്പർ ഹിറ്റുകൾക്ക് ശേഷം ഗിരീഷ് എ.ഡി. സംവിധാനം ചെയ്യുന്ന മറ്റൊരു മികച്ച റോം-കോം ചിത്രമാണിത്. തന്നേക്കാൾ 12 വയസ്സിലേറെ പ്രായക്കൂടുതലുള്ള അയൽവാസിയുമായി പ്രണയത്തിലാകുന്ന ഒരു കോളേജ് വിദ്യാർഥിനിയുടെ കഥയാണ് ഈ ചിത്രം പറയുന്നത്. പ്രണയവും ഹാസ്യവും സമന്വയിപ്പിച്ച ലളിതമായ കഥാതന്തുവാണെങ്കിലും, സിനിമയെ മുന്നോട്ട് നയിക്കുന്ന അവതരണ രീതിയും തിയേറ്റർ അനുഭവവുമാണ് ഇതിനെ ആകർഷകമാക്കുന്നത്.
തനിമയുള്ള അഭിനയം കൊണ്ട് പ്രേക്ഷകരുടെ മനസ്സിലേക്ക് എളുപ്പത്തിൽ ആഴത്തിലിറങ്ങാൻ നിവിൻ പോളിക്ക് സാധിക്കാറുണ്ട്. ഇതിലെ ‘ജസ്റ്റിൻ’ എന്ന കഥാപാത്രവും നിവിനായി മാത്രം മാറ്റിവെച്ചതുപോലെ അത്യന്തം സ്വാഭാവികമായാണ് അനുഭവപ്പെടുന്നത്. വൈകാരികമായ നിമിഷങ്ങളിലും ഹാസ്യരംഗങ്ങളിലും നിവിനും മമിതയും ഒന്നിനൊന്ന് മികച്ച പ്രകടനമാണ് കാഴ്ചവെക്കുന്നത്. ചുരുക്കത്തിൽ, എല്ലാത്തരം പ്രേക്ഷകരെയും ഒരേപോലെ തൃപ്തിപ്പെടുത്തുന്ന ഒരു സമ്പൂർണ്ണ വിനോദ ചിത്രമാണ് ‘ബെത്‌ലഹേം കുടുംബ യൂണിറ്റ്’.
