ആൽബർട്ടയിൽ കുറ്റവാളികളെ ജയിൽ മാറ്റുന്നതിനിടെയുണ്ടായ അപകടത്തിൽ രണ്ട് കറക്ഷണൽ ഓഫീസർമാരും ഒരു കുറ്റവാളിയും മരിച്ചതായി കറക്ഷണൽ സർവീസ് ഓഫ് കാനഡ (CSC) അറിയിച്ചു. എഡ്മിന്‍റനിലെ ഇൻസ്റ്റിറ്റ്യൂഷൻ ഫോർ വുമണിൽ നിന്നുള്ള ഓഫീസർമാരും തടവുകാരും സഞ്ചരിച്ചിരുന്ന മിനിവാനും ഒരു ഹിനോ ബോക്സ് ട്രക്കും കൂട്ടിയിടിച്ചാണ് അപകടം. ആൽബർട്ട-സസ്‌കാച്ചെവൻ അതിർത്തിക്കടുത്ത് ഹൈവേ 13 ഉം 41 ഉം ഇന്‍റർസെക്ഷനിൽ വ്യാഴാഴ്ച രാവിലെ 11 മണിയോടെയാണ് അപകടം നടന്നത്.
കറക്ഷണൽ സർവീസ് വാനിലുണ്ടായിരുന്ന നിക്കോളെ സെർബൻ, രമൺദീപ് കൗർ മാൻ എന്നീ ഉദ്യോഗസ്ഥരും 2024 മുതൽ ഏഴ് വർഷത്തെ തടവ് ശിക്ഷ അനുഭവിച്ചു വരികയായിരുന്ന കിയാര മൂസ്വ എന്ന തടവുകാരിയുമാണ് മരിച്ചത്. മൂവരും സംഭവസ്ഥലത്ത് തന്നെ മരിച്ചതായി സ്ഥിരീകരിച്ചു. ബോക്സ് ട്രക്ക് ഡ്രൈവറെ നിസാര പരുക്കുകളോടെ ആശുപത്രിയിൽ പ്രവേശിപ്പിച്ചു. അപകട കാരണം വ്യക്തമല്ല. അന്വേഷണം പുരോഗമിക്കുന്നു.
