ഉയർന്ന ആവശ്യകത കാരണം ഇന്ത്യക്കാർക്കുള്ള എംപ്ലോയ്മെന്റ് ബേസ്ഡ് ഫസ്റ്റ് പ്രിഫറൻസ് (EB-1) ഗ്രീൻ കാർഡ് വിഭാഗം വരും ആഴ്ചകളിൽ താൽക്കാലികമായി ലഭ്യമാകാതെ വന്നേക്കാമെന്ന് യുഎസ് സ്റ്റേറ്റ് ഡിപ്പാർട്ട്മെന്റ് മുന്നറിയിപ്പ് നൽകി. ഓഗസ്റ്റ് 2026-ലെ വിസ ബുള്ളറ്റിനിലാണ് ഡിപ്പാർട്ട്മെന്റ് ഇക്കാര്യം വ്യക്തമാക്കിയത്. സെപ്റ്റംബർ 30-ന് സാമ്പത്തിക വർഷം അവസാനിക്കുന്നതിന് മുൻപ് തന്നെ വിസ അപേക്ഷകരുടെ എണ്ണം ഉയർന്നാൽ ഇന്ത്യയ്ക്ക് അനുവദിച്ചിട്ടുള്ള ഇബി-1 വിസകളുടെ വാർഷിക പരിധി (Limit) പൂർത്തിയായേക്കാം. അങ്ങനെ സംഭവിച്ചാൽ, ഈ വിഭാഗത്തിൽ കൂടുതൽ വിസകൾ നൽകുന്നത് താൽക്കാലികമായി നിർത്തിവയ്ക്കേണ്ടി വരും. നിലവിലെ സാഹചര്യം നിരന്തരം നിരീക്ഷിച്ചു വരികയാണെന്നും ആവശ്യമായ മാറ്റങ്ങൾ വരുത്തുമെന്നും വകുപ്പ് കൂട്ടിച്ചേർത്തു.
വിസ ബുള്ളറ്റിനിൽ ഒരു വിസ വിഭാഗം “ലഭ്യമല്ല” (Unavailable) എന്ന് അടയാളപ്പെടുത്താൻ “U” (Unauthorized) എന്നാണ് രേഖപ്പെടുത്താറുള്ളത്. ഇതിനർത്ഥം അത്തരം അപേക്ഷകർക്ക് വിസ നമ്പറുകൾ നൽകാൻ അനുമതിയില്ല എന്നാണ്. വാർഷിക പരിധി പൂർത്തിയായാൽ ബാധിക്കപ്പെടുന്ന വിസ വിഭാഗം ഉടൻ തന്നെ “ലഭ്യമല്ലാത്തത്” ആക്കി മാറ്റുകയും, കൂടുതൽ വിസ നമ്പറുകൾക്കായുള്ള അഭ്യർത്ഥനകൾ അനുവദിക്കാതിരിക്കുകയും ചെയ്യുമെന്ന് അധികൃതർ വ്യക്തമാക്കി. അതേസമയം, ഇന്ത്യയുടെ ഇബി-1 വിഭാഗം പൂർണ്ണമായി അടഞ്ഞുപോയി എന്നല്ല ഇതിനർത്ഥം. 2026 ഓഗസ്റ്റിലെ വിസ ബുള്ളറ്റിൻ അനുസരിച്ച് നിലവിൽ ഫൈനൽ ആക്ഷൻ ഡേറ്റ് (Final Action Date) 2022 ഒക്ടോബർ 15 ആയി തുടരുന്നുണ്ട്. അനുവദിച്ച പരിധി തീരുകയാണെങ്കിൽ മാത്രമായിരിക്കും വരും ആഴ്ചകളിൽ ഇതിൽ മാറ്റമുണ്ടാവുക.
നിലവിലെ ഓഗസ്റ്റ് ബുള്ളറ്റിൻ പ്രകാരം, 2022 ഒക്ടോബർ 15-ന് മുൻപ് മുൻഗണനാ തീയതി (Priority date) ഉള്ള യോഗ്യരായ അപേക്ഷകർക്ക് വിസ നമ്പറുകൾ അനുവദിക്കുന്നുണ്ട്. അപേക്ഷകൾ സമർപ്പിക്കുന്നതിനുള്ള തീയതി (Dates for Filing) 2023 ഡിസംബർ 1 ആയിട്ടാണ് നിർണ്ണയിച്ചിരിക്കുന്നത്. മറ്റ് ഭൂരിഭാഗം രാജ്യങ്ങൾക്കും ഇബി-1 വിഭാഗം നിയന്ത്രണങ്ങളില്ലാതെ (“Current”) ലഭ്യമാണ്. ചൈനയ്ക്ക് 2023 ജൂലൈ 1 ആണ് ഫൈനൽ ആക്ഷൻ ഡേറ്റ്. എന്നാൽ ഇന്ത്യയിലെ ഉയർന്ന അപേക്ഷകരുടെ എണ്ണം കാരണം സാമ്പത്തിക വർഷാവസാനത്തിന് മുൻപ് പരിധി പൂർത്തിയായാൽ ഈ വിഭാഗം ലഭ്യമാകാതെ വരുമെന്ന് പ്രത്യേകം വ്യക്തമാക്കിക്കൊണ്ട് യുഎസ് ഡിപ്പാർട്ട്മെന്റ് ഇന്ത്യക്കാരായ അപേക്ഷകരെ പ്രത്യേകം ഓർമ്മിപ്പിച്ചു.
ഇതിനിടെ, എംപ്ലോയ്മെന്റ് ബേസ്ഡ് സെക്കൻഡ് പ്രിഫറൻസ് (EB-2) വിഭാഗത്തിൽ ഇന്ത്യാക്കാർക്ക് നിലവിൽ തന്നെ നിയന്ത്രണങ്ങൾ നേരിടുന്നുണ്ട്. ഓഗസ്റ്റിലെ വിസ ബുള്ളറ്റിനിൽ ഇന്ത്യയുടെ ഇബി-2 ഫൈനൽ ആക്ഷൻ ഡേറ്റ് “U” (Unavailable) എന്നാണ് അടയാളപ്പെടുത്തിയിരിക്കുന്നത്. എന്നിരുന്നാലും, ഇബി-2 വിഭാഗത്തിൽ ഇന്ത്യക്കാർക്കുള്ള ‘ഡേറ്റ്സ് ഫോർ ഫൈലിംഗ്’ chart-ൽ 2015 ജനുവരി 15 എന്ന് രേഖപ്പെടുത്തിയിട്ടുണ്ട്.
