ടൊറന്റോ: നഗരത്തിന്റെ കിഴക്കൻ, പടിഞ്ഞാറൻ മേഖലകളിൽ നിർദ്ദേശിച്ചിരിക്കുന്ന രണ്ട് കൃത്രിമബുദ്ധി (എഐ) ഡാറ്റാ സെന്ററുകളുടെ അനുമതികൾ ഒരു വർഷത്തേക്ക് നിർത്തിവെക്കണമെന്ന് ആവശ്യപ്പെട്ട് ടൊറന്റോ സിറ്റി ഹാളിന് മുന്നിൽ പ്രതിഷേധം അരങ്ങേറി. കാലാവസ്ഥാ വ്യതിയാനത്തിനെതിരെ പ്രവർത്തിക്കുന്ന രണ്ട് സന്നദ്ധ സംഘടനകളുടെ നേതൃത്വത്തിലാണ് നാല്‍പ്പതോളം ആളുകൾ പങ്കെടുത്ത പ്രതിഷേധ പ്രകടനം സംഘടിപ്പിച്ചത്. കൂടാതെ, ഈ പദ്ധതിയോട് എതിർപ്പ് പ്രകടിപ്പിച്ച് അയ്യായിരത്തിലധികം കത്തുകളാണ് നഗരസഭാ കൗൺസിലിന് നിവേദനമായി ലഭിച്ചിരിക്കുന്നത്. നിലവിൽ സ്കാർബറോയിൽ നിലവിലുള്ള ഒരു ഡാറ്റാ സെന്റർ വികസിപ്പിക്കാനും, എറ്റോബികോക്കിൽ ഒരു വൻകിട സാങ്കേതിക വിദ്യ കമ്പനിയുടെ പുതിയ കേന്ദ്രത്തിനുമാണ് അനുമതികൾ തേടുന്നത്.
ഡാറ്റാ സെന്ററുകൾ ഉണ്ടാക്കുന്ന പരിസ്ഥിതി, ഊർജ്ജ ആഘാതങ്ങളെക്കുറിച്ച് പഠനം നടത്താൻ പ്രാദേശിക കൗൺസിലർമാർ കൗൺസിലിൽ പ്രമേയം സമർപ്പിച്ചിട്ടുണ്ട്. നിലവിലെ നിയമനിർമ്മാണ പ്രകാരം ഇത്തരം പദ്ധതികൾക്ക് അനുമതി നൽകുന്നതിൽ പ്രാദേശിക ജനപ്രതിനിധികളെയോ പ്രദേശവാസികളെയോ വേണ്ടത്ര പങ്കെടുപ്പിക്കുന്നില്ലെന്നും ഉദ്യോഗസ്ഥ തലത്തിൽ മാത്രം തീരുമാനങ്ങൾ നടപ്പിലാക്കുകയാണെന്നും കൗൺസിലർ ചൂണ്ടിക്കാട്ടി. പദ്ധതിയുടെ പരിസ്ഥിതി ആഘാതത്തെക്കുറിച്ചും സ്ഥല ഉപയോഗത്തെക്കുറിച്ചും പൂർണ്ണമായ പഠനവും പൊതുജനങ്ങളുമായുള്ള ആശയവിനിമയവും ഉറപ്പുവരുത്താനാണ് പ്രമേയത്തിലൂടെ ആവശ്യപ്പെടുന്നത്.
വലിയ അളവിൽ വൈദ്യുതിയും വെള്ളവും ഉപയോഗിക്കുന്ന ഇത്തരം വൻകിട എഐ ഡാറ്റാ സെന്ററുകൾ വലിയ പ്രത്യാഘാതങ്ങൾ സൃഷ്ടിക്കുമെന്നാണ് പ്രദേശവാസികളുടെ ആശങ്ക. മുൻകൂട്ടി യാതൊരു അറിയിപ്പും നൽകാതെയാണ് മുൻപ് ഡാറ്റാ സെന്റർ പ്രവർത്തനം ആരംഭിച്ചതെന്ന് സമീപവാസികൾ പറയുന്നു. തങ്ങളുടെ പ്രദേശത്തിന് ഒരു ഗുണവുമില്ലാതെ, വിദേശ വൻകിട കമ്പനികളുടെ ലാഭത്തിനുവേണ്ടി പരിസ്ഥിതിയെയും വിഭവങ്ങളെയും ബലികൊടുക്കാൻ അനുവദിക്കില്ലെന്നും സുതാര്യതയും വ്യക്തതയും വേണമെന്നുമാണ് ജനങ്ങളുടെയും പരിസ്ഥിതി പ്രവർത്തകരുടെയും ആവശ്യം.
