അന്തർ പ്രവിശ്യാ മദ്യവിൽപ്പനയ്ക്ക് അനുമതി നൽകുന്ന കരാറിൽ ഒപ്പുവെച്ച് കാനഡയിലെ ഒമ്പത് പ്രീമിയർമാർ. പുതിയ കരാർ പ്രകാരം ഒരു പ്രവിശ്യയിൽ ഉൽപ്പാദിപ്പിക്കുന്ന ബിയർ, വൈൻ, സ്പിരിറ്റ്സ് എന്നിവ മറ്റ് പ്രവിശ്യകളിലെ ഉപഭോക്താക്കൾക്ക് നേരിട്ട് വാങ്ങാൻ സാധിക്കും. യുഎസ് പ്രസിഡൻ്റ് ഡൊണാൾഡ് ട്രംപ് കനേഡിയൻ ഉൽപ്പന്നങ്ങൾക്ക് 50% തീരുവ പ്രഖ്യാപിച്ച സാഹചര്യത്തിൽ ആഭ്യന്തര വ്യാപാര തടസ്സങ്ങൾ നീക്കി രാജ്യത്തെ സമ്പദ്‌വ്യവസ്ഥ ശക്തമാക്കുക എന്ന ലക്ഷ്യത്തോടെയാണ് ഈ കരാറിന് പ്രിമിയേഴ്സ് ടീം രൂപം നൽകിയത്.

2025 ജൂണിൽ തന്നെ എല്ലാ പ്രവിശ്യകളും നേരിട്ടുള്ള വിൽപ്പനയ്ക്ക് ധാരണയായിരുന്നു. നിലവിൽ ക്യുബെക്ക്, യൂക്കൺ, നോർത്ത്‌വെസ്റ്റ് ടെറിട്ടറീസ്, നുനാവുട്ട് എന്നിവ ഒഴികെയുള്ള ഒമ്പത് പ്രവിശ്യകളാണ് പുതിയ കരാറിൽ ഒപ്പുവെച്ചിരിക്കുന്നത്. ക്യുബെക്കും യൂക്കണും ഉടൻ തന്നെ കരാറിന്‍റെ ഭാഗമാകും. ആവശ്യമായ നിയമഭേദഗതികൾ പൂർത്തിയാക്കി 2027 ഫെബ്രുവരിയിലായിരിക്കും ബ്രിട്ടീഷ് കൊളംബിയ സർക്കാർ പുതിയ കരാറിൽ പങ്കാളികളാവുക. അതേസമയം, പ്രാദേശികമായി നിലനിൽക്കുന്ന മദ്യനിയന്ത്രണങ്ങളും പ്രത്യേക സാഹചര്യങ്ങളും കാരണമാണ് കരാറിൽ ഒപ്പുവെക്കാത്തതെന്ന് നോർത്ത്‌വെസ്റ്റ് ടെറിട്ടറീസും നുനാവുട്ടും വ്യക്തമാക്കിയിട്ടുണ്ട്. വരുംദിവസങ്ങളിൽ ഫെഡറൽ സർക്കാരുമായി ചേർന്ന് മറ്റ് വ്യാപാര തടസ്സങ്ങൾ കൂടി നീക്കാനുള്ള തുടർനടപടികൾ സ്വീകരിക്കുമെന്ന് പ്രീമിയർമാർ സംയുക്ത പ്രസ്താവനയിലൂടെ അറിയിച്ചു.