കാൽഗറിയിലെ സ്റ്റോണി ട്രെയിലിൽ മദ്യപിച്ചും മൊബൈലിൽ വിഡിയോ കണ്ടും അമിതവേഗത്തിൽ വാഹനമോടിച്ചയാൾക്കെതിരെ കർശന നടപടി സ്വീകരിച്ച് പോലീസ്. മണിക്കൂറിൽ 100 കിലോമീറ്റർ വേഗം അനുവദനീയമായ റോഡിൽ 191 കിലോമീറ്ററിലാണ് ഇയാൾ കാറോടിച്ചത്. വണ്ടിയോടിക്കുന്നതിനിടയിൽ ഇയാൾ മൊബൈൽ ഫോണിൽ വിഡിയോ കാണുന്നുമുണ്ടായിരുന്നു. കൂടാതെ മദ്യപിച്ചിരുന്നതായും കണ്ടെത്തിയിട്ടുണ്ട്.
നിയമലംഘനം അതീവ ഗുരുതരമായതിനാൽ സംഭവസ്ഥലത്തു വച്ചുതന്നെ പോലീസ് കടുത്ത നടപടി സ്വീകരിച്ചു. ഡ്രൈവിംഗ് ലൈസൻസ് 90 ദിവസത്തേക്ക് സസ്പെൻഡ് ചെയ്തു. കൂടാതെ വാഹനം 30 ദിവസത്തേക്ക് പോലീസ് പിടിച്ചെടുത്തു. വണ്ടിയോടിക്കുമ്പോൾ ഫോണിൽ വിഡിയോ കണ്ടതിന് 300 ഡോളർ പിഴ ചുമത്തി. അമിതവേഗം, മദ്യപിച്ച് വാഹനമോടിക്കൽ തുടങ്ങിയ കേസുകളിൽ കോടതിയിൽ ഹാജരാകാൻ ഇയാൾക്ക് സമൻസ് അയച്ചിട്ടുണ്ട്. കോടതി നടപടികൾ പൂർത്തിയാകുന്നതോടെ വലിയ തുക പിഴയായി ഇയാൾ ഒടുക്കേണ്ടി വരുമെന്ന് പോലീസ് അറിയിച്ചു.
