തട്ടിപ്പുകൾ തടയാൻ ലക്ഷ്യമിട്ട് ഇമിഗ്രേഷൻ കൺസൾട്ടൻ്റ് നിയന്ത്രണങ്ങൾ നടപ്പിലാക്കി കാനഡ. ഇമിഗ്രേഷൻ കൺസൾട്ടൻ്റുകളുടെ പ്രവർത്തനങ്ങളെ നിയന്ത്രിക്കാനും തട്ടിപ്പുകൾ തടയാനും ഇരകളായവർക്ക് നഷ്ടപരിഹാരം ഉറപ്പാക്കാനും ലക്ഷ്യമിട്ടുള്ള പുതിയ നിയന്ത്രണങ്ങൾ ജൂലൈ 15 മുതൽ പ്രാബല്യത്തിൽ വന്നു.
ഇതോടെ ഇമിഗ്രേഷൻ കൺസൾട്ടൻ്റുകൾക്കെതിരെയുള്ള പരാതികളിൽ തെളിവ് ലഭിച്ചാൽ 50,000 ഡോളർ വരെ പിഴ ചുമത്താൻ കോളേജ് ഓഫ് ഇമിഗ്രേഷൻ ആൻഡ് സിറ്റിസൺഷിപ്പ് കൺസൾട്ടന്റസിന് (CICC) സാധിക്കും. കൂടാതെ ഇമിഗ്രേഷൻ കൺസൾട്ടൻ്റുമാർ മൂലം സാമ്പത്തിക നഷ്ടം സംഭവിച്ചവർക്ക് സഹായം നൽകുന്നതിനായി പ്രത്യേക നഷ്ടപരിഹാര ഫണ്ടും ആരംഭിച്ചു. ഇമിഗ്രേഷൻ കൺസൾട്ടൻ്റുമാരുടെ പ്രവർത്തനങ്ങൾ കൂടുതൽ സുതാര്യമാക്കാൻ 2027 ഏപ്രിലോടെ പബ്ലിക് രജിസ്റ്റർ വിപുലീകരിക്കും. ഇതോടെ ഇമിഗ്രേഷൻ കൺസൾട്ടൻ്റുമാരുടെ എല്ലാ വിവരങ്ങളും പരിശോധിക്കാൻ സാധിക്കും.
അതേസമയം കാനഡയിലേക്ക് കുടിയേറാൻ ആഗ്രഹിക്കുന്നവർ, തങ്ങളുടെ ഇമിഗ്രേഷൻ കൺസൾട്ടൻ്റുമാർ ലൈസൻസുള്ളവരാണോ എന്ന് register.college-ic.ca എന്ന വെബ്സൈറ്റിലൂടെ പരിശോധിക്കണമെന്ന് ഫെഡറൽ സർക്കാർ നിർദ്ദേശിച്ചു. രേഖാമൂലമുള്ള കരാറുകൾ ഇല്ലാതെ പണം നൽകരുത്. കൺസൾട്ടൻ്റുമാരുടെ വാഗ്ദാനങ്ങൾ കണ്ണുമടച്ച് വിശ്വസിക്കാതെ ഔദ്യോഗിക ചാനലുകൾ വഴി കാര്യങ്ങൾ ഉറപ്പുവരുത്തുക. തട്ടിപ്പുകൾ ശ്രദ്ധയിൽപ്പെട്ടാൽ ഉടൻ തന്നെ CICC-ൽ ഔദ്യോഗികമായി പരാതി നൽകുക. ഈ നിയമങ്ങൾ കുടിയേറ്റ സേവനങ്ങളിലെ അഴിമതികൾ കുറയ്ക്കാനും അപേക്ഷകർക്ക് കൂടുതൽ സുരക്ഷിതമായ അനുഭവം നൽകാനും സഹായിക്കുമെന്നാണ് സർക്കാർ വിലയിരുത്തുന്നത്.
