എഐ തയ്യാറാക്കുന്ന റെസ്യൂമെകളും ചാറ്റ്ജിപിടി ഇന്റർവ്യൂകളും കാരണം നിയമന രീതികൾ തിരുത്തിയെഴുതാൻ കമ്പനികൾ നിർബന്ധിതരാകുന്നു
ദുബായ്: ആകർഷകമായ ഒരു റെസ്യൂമെയും ആത്മവിശ്വാസത്തോടെയുള്ള ഇന്റർവ്യൂവും ആയിരുന്നു ഒരുകാലത്ത് ഒരു ഉദ്യോഗാർത്ഥിക്ക് ജോലി ലഭിക്കാനുള്ള ഏറ്റവും വലിയ യോഗ്യതകളായി കണക്കാക്കപ്പെട്ടിരുന്നത്. എന്നാൽ, ആർട്ടിഫിഷ്യൽ ഇന്റലിജൻസ് (AI) നിയമന പ്രക്രിയകളിൽ ആഴത്തിൽ സ്വാധീനം ചെലുത്താൻ തുടങ്ങിയതോടെ ഈ ധാരണകൾ വലിയ പ്രതിസന്ധി നേരിടുകയാണ്. റെസ്യൂമെകൾ എഴുതുന്നതിനും, അസ്സസ്മെന്റുകൾ (പരീക്ഷകൾ) പൂർത്തിയാക്കുന്നതിനും, വിഡിയോ ഇന്റർവ്യൂകളിൽ തത്സമയം ഉത്തരങ്ങൾ കണ്ടെത്തുന്നതിനും ഉദ്യോഗാർത്ഥികൾ ജനറേറ്റീവ് എഐ വ്യാപകമായി ഉപയോഗിക്കുന്നതായി ആഗോളതലത്തിൽ കമ്പനികൾ കണ്ടെത്തുന്നുണ്ട്. ഇതോടെ, ഒരാളുടെ യഥാർത്ഥ കഴിവും എഐയുടെ സഹായത്തോടെയുള്ള പ്രകടനവും തമ്മിൽ വേർതിരിച്ചറിയാൻ കഴിയാത്ത അവസ്ഥയാണെന്ന് നിയമന വിദഗ്ധർ പറയുന്നു. ഇത് റിക്രൂട്ട്മെന്റ് രീതികൾ അടിമുടി മാറ്റാൻ തൊഴിലുടമകളെ പ്രേരിപ്പിക്കുകയാണ്.
ഇതൊരു ഒറ്റപ്പെട്ട പ്രശ്നമല്ലെന്നും റിക്രൂട്ട്മെന്റിന്റെ പ്രാരംഭ ഘട്ടങ്ങൾ ഒട്ടും വിശ്വസിക്കാൻ കൊള്ളാത്തതായി മാറിക്കൊണ്ടിരിക്കുകയാണെന്നും ഹാർവാർഡ് ബിസിനസ് റിവ്യൂ വ്യക്തമാക്കുന്ന പഠനങ്ങൾ ചൂണ്ടിക്കാണിക്കുന്നു. ലിഖിത അപേക്ഷകളും റിമോട്ട് ഇന്റർവ്യൂകളും ഇപ്പോൾ എഐ വഴി വൻതോതിൽ സ്വാധീനിക്കപ്പെടുന്നുണ്ട്. യഥാർത്ഥ പ്രതിഭകളെ കണ്ടെത്താൻ ഇത്തരം ഫിൽട്ടറുകൾ പരാജയപ്പെടുമ്പോൾ, ജോലി ചെയ്യാൻ ഏറ്റവും അനുയോജ്യരായവർക്ക് പകരം റിക്രൂട്ട്മെന്റ് സമയത്ത് മികച്ച രീതിയിൽ പ്രകടനം കാഴ്ചവെക്കാൻ കഴിയുന്നവരെ തിരഞ്ഞെടുക്കേണ്ട അവസ്ഥയിലാണ് കമ്പനികൾ. ബ്ലൂംബെർഗ് ബിസിനസ്വീക്ക് റിപ്പോർട്ട് ചെയ്ത ഒരു ഹയറിംഗ് മാനേജരുടെ അനുഭവം ഇതിന് മികച്ച ഉദാഹരണമാണ്. ഒരു ഗ്രാന്റ്-റൈറ്റിംഗ് തസ്തികയിലേക്ക് നടത്തിയ വെർച്വൽ ഇന്റർവ്യൂവിൽ മികച്ച പ്രകടനം കാഴ്ചവെച്ച ഒരാളെ അവർ തികച്ചും അനുയോജ്യനായ സ്ഥാനാർത്ഥിയായി കണക്കാക്കി ജോലിക്ക് എടുത്തു. എന്നാൽ ജോലിയിൽ പ്രവേശിച്ച് ഏതാനും ആഴ്ചകൾക്കുള്ളിൽ തന്നെ, ഇന്റർവ്യൂവിൽ കാണിച്ച യാതൊരുവിധ നൈപുണ്യവും അയാൾക്കില്ലെന്ന് മാനേജർക്ക് ബോധ്യപ്പെട്ടു. ഇന്റർവ്യൂവിനിടയിലെ പൊതുവായ പ്രതികരണങ്ങൾ, സ്ഥാപനത്തിന്റെ വെബ്സൈറ്റിലുള്ള അതേ വാചകങ്ങൾ ഉപയോഗിച്ചുള്ള മറുപടികൾ, അസ്വാഭാവികമായ രീതിയിലുള്ള ഉത്തരങ്ങൾ എന്നിവ പിന്നീട് ശ്രദ്ധിച്ചപ്പോഴാണ്, അയാൾ ഇന്റർവ്യൂവിലുടനീളം ചാറ്റ്ജിപിടിയോ മറ്റ് ചാറ്റ്ബോട്ടുകളോ ഉപയോഗിച്ചിരിക്കാമെന്ന് അവർ സംശയിച്ചത്. ഹ്യൂമൻ റിസോഴ്സ് (HR) ഉപദേശകർ പറയുന്നത് അനുസരിച്ച് സമാനമായ സംഭവങ്ങൾ ഇപ്പോൾ വളരെ സാധാരണമായിക്കൊണ്ടിരിക്കുകയാണ്.
അമേരിക്ക ആസ്ഥാനമായുള്ള ഗവേഷണ-ഉപദേശക സ്ഥാപനമായ ഗാർട്ട്നർ നടത്തിയ സർവേ വിവരങ്ങളും ഈ പ്രവണത ശരിവെക്കുന്നു. സർവേ പ്രകാരം ഏകദേശം പകുതിയോളം ഉദ്യോഗാർത്ഥികളും അവരുടെ തൊഴിലന്വേഷണത്തിനിടയിൽ എവിടെയെങ്കിലുമൊക്കെ എഐ ഉപയോഗിക്കുന്നുണ്ട്. പലരും റെസ്യൂമെ നന്നാക്കാനും കവർ ലെറ്ററുകൾ തയ്യാറാക്കാനും പോലുള്ള സാധാരണ ആവശ്യങ്ങൾക്കാണ് ഇത് ഉപയോഗിക്കുന്നതെങ്കിൽ, മറ്റ് ചിലർ റൈറ്റിംഗ് സാമ്പിളുകൾ ഉണ്ടാക്കാനും, ഓൺലൈൻ പരീക്ഷകൾക്ക് ഉത്തരം നൽകാനും, ഇന്റർവ്യൂവിൽ തത്സമയം മറുപടി നൽകാനും എഐയെ ആശ്രയിക്കുന്നു. വിഡിയോ ഇന്റർവ്യൂകൾ നടക്കുമ്പോൾ തന്നെ തത്സമയം ചാറ്റ്ബോട്ടുകൾ ഉപയോഗിച്ചതായി ഏകദേശം 13 ശതമാനം ആളുകൾ സർവേയിൽ തുറന്നുസമ്മതിച്ചിട്ടുണ്ട്.
