കാട്ടുതീ പടർന്നു പിടിച്ച സാഹചര്യത്തിൽ വടക്കുപടിഞ്ഞാറൻ ഒൻ്റാരിയോയിലെ നിരവധി കമ്മ്യൂണിറ്റികളിലെ താമസക്കാർ ഒഴിഞ്ഞു പോകണമെന്ന് അധികൃതർ നിർദ്ദേശിച്ചു. ആംസ്ട്രോങ്, ലാക് ലാ ക്രോയിക്സ് ഫസ്റ്റ് നേഷൻ, കോളിൻസ് ഫസ്റ്റ് നേഷൻ, വൈറ്റ്സാൻഡ് ഫസ്റ്റ് നേഷൻ, ലാക് ഡെസ് മില്ലെ ലാക്സ് ഫസ്റ്റ് നേഷൻ എന്നീ കമ്മ്യൂണിറ്റികളിലാണ് ഒഴിപ്പിക്കൽ ഉത്തരവ് നൽകിയിരിക്കുന്നതെന്ന് ഒൻ്റാരിയോ പ്രൊവിൻഷ്യൽ പോലീസ് അറിയിച്ചു. അതേസമയം, ഇഗ്നേസ്, ക്രിസ്റ്റൽ ലേക്ക്, ഹൈവേ 633 പ്രദേശങ്ങളിലുള്ളവർ ഒഴിപ്പിക്കലുകൾക്ക് തയ്യാറാകണമെന്ന് ഒപിപി പറഞ്ഞു.

ഈ കമ്മ്യൂണിറ്റികൾ നിർബന്ധിത ഒഴിപ്പിക്കൽ ഉത്തരവുകൾക്ക് കീഴിലാണെന്നും പ്രദേശത്തെ നിരവധി ഹൈവേകളുടെ ചില ഭാഗങ്ങൾ അടച്ചിട്ടിരിക്കുകയാണെന്നും പോലീസ് പറഞ്ഞു. റെയ്‌നി റിവർ ഡിസ്ട്രിക്റ്റ്, ഗൾ ബേ ഫസ്റ്റ് നേഷൻ എന്നറിയപ്പെടുന്ന കിയാഷ്‌കെ സാഗിംഗ് അനിഷിനാബെക്ക് എന്നിവയുൾപ്പെടെ പ്രദേശത്തെ മറ്റ് കമ്മ്യൂണിറ്റികളും കാട്ടുതീ ഭീതിയിലാണ്. അതിശക്തമായ കാട്ടുതീയും ഒഴിപ്പിക്കൽ ഉത്തരവുകളും കാരണം ജൂലൈ 20 വരെ വാബാകിമി പ്രൊവിൻഷ്യൽ പാർക്ക് അടച്ചിടുമെന്ന് അധികൃതർ അറിയിച്ചു.

പ്രവിശ്യയിലുടനീളം നിലവിൽ 160 കാട്ടുതീകൾ സജീവമായി തുടരുന്നുണ്ടെന്ന് ഒൻ്റാരിയോ വനം അഗ്നിശമന ഉദ്യോഗസ്ഥർ റിപ്പോർട്ട് ചെയ്തു. ഇതിൽ 53 എണ്ണം നിയന്ത്രണവിധേയമായിട്ടില്ല. എട്ട് തീപിടുത്തങ്ങൾ നിയന്ത്രണവിധേയമാണ്, നാല് തീപിടുത്തങ്ങൾ നിയന്ത്രണത്തിലാണ്, 63 തീപിടുത്തങ്ങൾ നിരീക്ഷണത്തിലുമാണ്, ഉദ്യോഗസ്ഥർ വെളിപ്പെടുത്തി.