സാന് ഫ്രാന്സിസ്കോ ആല്ക്കാട്രാസ് ദ്വീപിന് സമീപം ഉള്ക്കടലില് ബോട്ട് മുങ്ങി ഒരാള് മരിച്ചു, രണ്ടുപേരെ കാണാതായി. മൂന്ന് നിലകളുള്ള വിനോദയാത്രാ ബോട്ടില് 19 പേര് ഉണ്ടായിരുന്നു. 13 പേരെ രക്ഷപ്പെടുത്തിയതായി സാന് ഫ്രാന്സിസ്കോ ഫയർഫോഴ്സ് മേധാവി ഡീന് ക്രിസ്പന് അറിയിച്ചു. കാണാതായ രണ്ടുപേര്ക്കായുള്ള തിരച്ചില് തുടരുകയാണ്.
ബോട്ടില് തീപിടിത്തമുണ്ടെന്ന വിവരമാണ് ആദ്യം ലഭിച്ചതെന്ന് സാന് ഫ്രാന്സിസ്കോ അഗ്നിശമന വകുപ്പ് അറിയിച്ചു. എന്നാല് ബോട്ടില് തീപിടിത്തമുണ്ടായതായി ഇതുവരെ തെളിവുകളൊന്നും ലഭിച്ചിട്ടില്ലെന്നും അധികൃതര് വ്യക്തമാക്കി. യു.എസ്. കോസ്റ്റ് ഗാര്ഡും മറ്റ് നിരവധി പ്രാദേശിക രക്ഷാപ്രവര്ത്തന സേനകളും സംയുക്തമായാണ് രക്ഷാപ്രവർത്തനം നടത്തിയത്. തിരച്ചിലിനായി പ്രത്യേക പരിശീലനം നേടിയ നീന്തല് വിദഗ്ധരെയും സ്കൂബാ ഡൈവര്മാരെയും വിന്യസിച്ചിട്ടുണ്ട്.
