കേരളത്തിലെ എൻജിനീയറിങ് പ്രവേശന പരീക്ഷയായ ‘കീം’ (KEAM) നടത്തുന്നതുമായി ബന്ധപ്പെട്ട് പുതിയ പുനരാലോചനകൾക്ക് സർക്കാർ തുടക്കം കുറിക്കുന്നു. പരീക്ഷാ രീതികളിൽ വരുത്തേണ്ട മാറ്റങ്ങളെക്കുറിച്ച് പഠിക്കാനും ബദൽ മാർഗങ്ങൾ നിർദേശിക്കാനുമായി ഉന്നത വിദ്യാഭ്യാസ കൗൺസിൽ വൈസ് ചെയർമാൻ ഡോ. അച്യുത് ശങ്കറിനെ ചുമതലപ്പെടുത്തിയിട്ടുണ്ട്. ഇതിനായി പ്രത്യേക കമ്മീഷനെ നിയോഗിക്കുമെന്നും അദ്ദേഹം വ്യക്തമാക്കി. ഉന്നത വിദ്യാഭ്യാസ മേഖലയിൽ വലിയ രീതിയിലുള്ള പൊളിച്ചെഴുത്ത് നടത്തുമെന്ന ബജറ്റ് പ്രഖ്യാപനത്തിന് പിന്നാലെയാണ്, കൂടുതൽ വിദ്യാർഥികളെ കേരളത്തിലേക്ക് ആകർഷിക്കുക എന്ന ലക്ഷ്യത്തോടെ ഈ ചർച്ചകൾ ആരംഭിച്ചിരിക്കുന്നത്. അടുത്ത അധ്യയന വർഷത്തിന് മുൻപ് തന്നെ പ്രവേശന രീതികളിൽ ആവശ്യമായ മാറ്റങ്ങൾ വരുത്താനാണ് അധികൃതർ ആലോചിക്കുന്നത്.
കഴിഞ്ഞ ദിവസം നടന്ന എൻജിനീയറിങ് കോളജ് പ്രതിനിധികളുടെയും വിദ്യാഭ്യാസ വിദഗ്ദ്ധരുടെയും യോഗത്തിൽ കീം പരീക്ഷ പൂർണ്ണമായും നിർത്തലാക്കണമെന്ന ആവശ്യവും ഉയർന്നു വന്നിട്ടുണ്ട്. നിലവിൽ കേരളത്തിലെ 20 മുതൽ 25 ശതമാനം വരെ വിദ്യാർഥികൾ ഉപരിപഠനത്തിനായി അയൽ സംസ്ഥാനങ്ങളെയാണ് ആശ്രയിക്കുന്നത്. ഇതിൽ ഭൂരിഭാഗം പേരും തിരഞ്ഞെടുക്കുന്ന തമിഴ്നാട്ടിൽ എൻജിനീയറിങ് പ്രവേശനത്തിന് പ്രത്യേക പരീക്ഷകളില്ല എന്നതും ശ്രദ്ധേയമാണ്. കേരളത്തിൽ ഇരുപതിനായിരത്തോളം എൻജിനീയറിങ് സീറ്റുകൾ ഒഴിഞ്ഞുകിടക്കുന്ന സാഹചര്യത്തിലും, കഴിഞ്ഞ പത്ത് വർഷത്തിനിടെ ഇരുപതോളം കോളജുകൾ പൂട്ടേണ്ടി വന്ന പശ്ചാത്തലത്തിലുമാണ് ഈ നീക്കം. പ്രവേശന പരീക്ഷയുടെ സങ്കീർണ്ണതയാണ് മറ്റു സംസ്ഥാനങ്ങളിൽ നിന്നുള്ള വിദ്യാർഥികൾ കേരളത്തിലേക്ക് വരാതിരിക്കാൻ പ്രധാന കാരണമെന്നാണ് ഈ മേഖലയിലുള്ളവർ ചൂണ്ടിക്കാണിക്കുന്നത്.
