ഐശ്വര്യത്തിന്‍റെയും സമൃദ്ധിയുടെയും പ്രതീകമായ ചിങ്ങമാസത്തിൽ എഡ്മിന്‍റനിലെ മലയാളികൾ ഓണം ആഘോഷിക്കാനൊരുങ്ങുന്നു. കേരളീയ പാരമ്പര്യവും സംസ്കാരവും നിലനിർത്തി എഡ്മിന്‍റൻ മലയാളീ അസോസിയേഷൻ ഓഫ് ആൽബർട്ട (EMAA) ദേ മാവേലി 2026 എന്ന പേരിൽ ഓണാഘോഷം സംഘടിപ്പിക്കുന്നു. ഓഗസ്റ്റ് 15 ശനിയാഴ്ച രാവിലെ പത്ത് മുതൽ വൈകുന്നേരം ആറു വരെ എഡ്മിന്‍റനിലെ ബാൽവിൻ കമ്മ്യൂണിറ്റി ഹാളിലാണ് (100010 154 ST NW, AB T5P 3C5) ഓണാഘോഷ പരിപാടികൾ ഒരുക്കിയിരിക്കുന്നത്.

ഓണാഘോഷത്തോടനുബന്ധിച്ച് വിവിധ കലാപരിപാടികൾ, ഓണസദ്യ, വിനോദ മത്സരങ്ങൾ, സാംസ്കാരിക പ്രദർശനം തുടങ്ങിയവ ഒരുക്കിയിട്ടുണ്ടെന്ന് EMAA എഡ്മിന്‍റൻ ഭാരവാഹികൾ അറിയിച്ചു. അസോസിയേഷൻ അംഗങ്ങൾ കുടുംബാംഗങ്ങളോടും സുഹൃത്തുക്കളോടും ഒപ്പം ഓണാഘോഷത്തിൽ പങ്കുചേരണമെന്ന് ഭാരവാഹികൾ അഭ്യർത്ഥിച്ചു.