ഇറാനെതിരായ സൈനിക നടപടികൾ അവസാനിപ്പിക്കണമെന്ന ആവശ്യവുമായി അമേരിക്കൻ സെനറ്റ് രംഗത്ത്. റിപ്പബ്ലിക്കൻ പാർട്ടിക്ക് ഭൂരിപക്ഷമുള്ള സെനറ്റിൽ നടന്ന നിർണ്ണായക വോട്ടെടുപ്പിൽ, പ്രസിഡൻ്റ് ഡൊണാൾഡ് ട്രംപിന്‍റെ നയങ്ങളെ തള്ളിക്കൊണ്ട് ഇറാനുമായുള്ള ശത്രുത അവസാനിപ്പിക്കാൻ പ്രമേയം പാസാക്കി.
50-48 എന്ന നിലയിലാണ് പ്രമേയം പാസായത്. റിപ്പബ്ലിക്കൻ പാർട്ടിയിലെ നാല് സെനറ്റർമാർ ഡെമോക്രാറ്റുകളുമായി ചേർന്ന് പ്രമേയത്തെ അനുകൂലിച്ചത് ട്രംപ് ഭരണകൂടത്തിന് തിരിച്ചടിയായി. ഫെബ്രുവരി 28-ന് ആരംഭിച്ച യുദ്ധം അമേരിക്കൻ പൊതുസമൂഹത്തിനിടയിൽ വലിയ അതൃപ്തിക്ക് കാരണമായിട്ടുണ്ട്. ഇറാനുമായുള്ള യുദ്ധത്തിൽ നിന്ന് അമേരിക്കൻ സൈന്യത്തെ പിൻവലിക്കണമെന്നാണ് പ്രമേയത്തിലെ പ്രധാന ആവശ്യം. എന്നാൽ, ഈ വോട്ടെടുപ്പിന് നിയമപരമായ സാധുതയുണ്ടാകുമോ എന്നതിൽ തർക്കങ്ങൾ നിലനിൽക്കുന്നുണ്ട്. 1973-ലെ വാർ പവേഴ്സ് ആക്ട് പ്രകാരം പാസാക്കുന്ന പ്രമേയങ്ങൾക്ക് പ്രസിഡൻ്റിന്‍റെ ഒപ്പ് ആവശ്യമില്ലെങ്കിലും, ഇത് ഭരണഘടനാ വിരുദ്ധമാണെന്നും തങ്ങൾ ഇതിനെ അംഗീകരിക്കില്ലെന്നും വൈറ്റ് ഹൗസ് ഇതിനകം വ്യക്തമാക്കിയിട്ടുണ്ട്.
