കാലാവസ്ഥാ വ്യതിയാനത്തെ ചെറുക്കാനും നഗരജീവിതം കൂടുതൽ മനോഹരമാക്കാനും ജനങ്ങളും ഭരണകൂടവും കൈകോർക്കുന്ന സൗജന്യ വൃക്ഷതൈ വിതരണ പദ്ധതിയായ ‘ബ്രാഞ്ചിംഗ് ഔട്ടി’ന് തുടക്കം കുറിച്ച് കാൽഗറി സിറ്റി. ജനശ്രദ്ധയാകർഷിക്കുന്ന ഈ പദ്ധതിയിലൂടെ നഗരത്തിലെ വൃക്ഷങ്ങളുടെ സാന്നിധ്യം നിലവിലുള്ള പത്ത് ശതമാനത്തിൽ നിന്നും 2060 ഓടെ 16 ശതമാനമായി ഉയർത്തുകയാണ് ലക്ഷ്യം. ഈ വർഷം 10,000 തൈകളാണ് സൗജന്യമായി വിതരണം ചെയ്യുന്നത്. മരങ്ങൾ കുറവുള്ള വടക്ക്-കിഴക്കൻ, തെക്ക്-കിഴക്കൻ മേഖലകളിലെ ജനവാസ കേന്ദ്രങ്ങൾക്കാണ് മുൻഗണന. ഈ വർഷത്തെ വൃക്ഷതൈ വിതരണം കഴിഞ്ഞ വാരാന്ത്യത്തിൽ തെക്ക്-കിഴക്കൻ മേഖലയിൽ ആരംഭിച്ചു. ജൂൺ 20, 21 തീയതികളിൽ ഈ വർഷത്തെ തൈ വിതരണം അവസാനിക്കും.
2019-ൽ വെറും 500 തൈകൾ വിതരണം ചെയ്ത് ആരംഭിച്ച ഈ പദ്ധതിക്ക് വലിയ ജനപിന്തുണയാണ് ലഭിക്കുന്നത്. കഴിഞ്ഞ വർഷം 5,000 തൈകൾ വിതരണം ചെയ്ത സ്ഥാനത്ത്, ഇത്തവണ അത് ഇരട്ടിയാക്കി 10,000 ആയി ഉയർത്തി. ഇതിൽ ആറായിരം മരങ്ങൾ ഏറ്റവും കുറവുള്ള കിഴക്കൻ മേഖലകൾക്കായാണ് മാറ്റിവെച്ചിരിക്കുന്നത്.
