ലണ്ടനിൽ സുഹൃത്തുക്കളോടൊപ്പം സമയം ചിലവഴിച്ച ശേഷം വീട്ടിലേക്ക് മടങ്ങുകയായിരുന്ന ഹെൻറി നൊവാക് എന്ന പതിനെട്ടുകാരനായ വിദ്യാർത്ഥിയെ കത്തികൊണ്ട് കുത്തിക്കൊലപ്പെടുത്തിയ കേസിൽ ഇരുപത്തിമൂന്നുകാരനായ വിക്രം ദിഗ എന്ന സിഖ് യുവാവിന് കോടതി ജീവപര്യന്തം തടവ് ശിക്ഷ വിധിച്ചു. സൗതാംപ്ടൺ ക്രൗൺ കോടതിയാണ് ഈ നിർണ്ണായക വിധി പ്രസ്താവിച്ചത്. പ്രതി കുറഞ്ഞത് 21 വർഷമെങ്കിലും ജയിൽ ശിക്ഷ അനുഭവിക്കണമെന്ന് കോടതി വിധിന്യായത്തിൽ പ്രത്യേകം വ്യക്തമാക്കിയിട്ടുണ്ട്.
കൊലപാതകത്തിന് ശേഷം, താൻ വംശീയമായ അധിക്ഷേപങ്ങൾക്ക് ഇരയായെന്നും അക്രമികൾ തന്റെ തലപ്പാവ് തട്ടിയെറിഞ്ഞ് പരിക്കേൽപ്പിച്ചെന്നുമാണ് വിക്രം ദിഗ പൊലീസിനോട് പറഞ്ഞിരുന്നത്. താൻ ഒരു മോശം മനുഷ്യനാണോ എന്ന് ഹെൻറി ചോദിച്ചത് തന്നെ അപമാനിക്കുന്നതായി തോന്നിയതാണ് അക്രമത്തിലേക്ക് നയിച്ചതെന്നും പ്രതി വാദിച്ചു. എന്നാൽ, തന്റെ ബെൽറ്റിൽ സൂക്ഷിച്ചിരുന്ന വലിയ കത്തി ഉപയോഗിച്ചാണ് ദിഗ ഈ ക്രൂരകൃത്യം ചെയ്തതെന്നും ഹെൻറിയുടെ ഭാഗത്തുനിന്ന് വംശീയമായ യാതൊരുവിധ പരാമർശങ്ങളും ഉണ്ടായിട്ടില്ലെന്ന് തനിക്ക് പൂർണ്ണ ഉറപ്പാണെന്നും കേസ് പരിഗണിച്ച ജഡ്ജി വില്യം മൗസ്ലി വ്യക്തമാക്കി.
അതേസമയം, കുത്തേറ്റു ചോര വാർന്നു മരിക്കാറായ അവസ്ഥയിലായിരുന്ന ഹെൻറിയോട് പൊലീസ് ഉദ്യോഗസ്ഥർ കാട്ടിയ അനാസ്ഥയെക്കുറിച്ചുള്ള വിവരങ്ങളും പുറത്തുവന്നിട്ടുണ്ട്. തനിക്ക് കുത്തേറ്റു എന്ന് ഹെൻറി ആവർത്തിച്ചു പറഞ്ഞിട്ടും അത് വിശ്വസിക്കാതെ പൊലീസ് ഹെൻറിയെ അറസ്റ്റ് ചെയ്യുകയും കൈവിലങ്ങ് അണിയിക്കുകയുമാണുണ്ടായത്. ‘നിനക്ക് കുത്തേറ്റിട്ടില്ല സുഹൃത്തേ’ എന്നായിരുന്നു ഡ്യൂട്ടിയിലുണ്ടായിരുന്ന ഉദ്യോഗസ്ഥന്റെ മറുപടി. മിനിറ്റുകൾക്കകം ഹെൻറി അബോധാവസ്ഥയിലായ ശേഷമാണ് അവർ ആംബുലൻസ് പോലും വിളിക്കാൻ തയ്യാറായത്. തനിക്ക് ശ്വാസം മുട്ടുന്നുവെന്ന് മകൻ ഒൻപത് തവണ പൊലീസുകാരോട് കെഞ്ചിപ്പറഞ്ഞിരുന്നതായി ഹെൻറിയുടെ പിതാവ് മാർക് പിന്നീട് വെളിപ്പെടുത്തി.
