കാനഡയിൽ നിന്ന് ആൽബർട്ട പ്രവിശ്യ വേർപിരിയുന്നതുമായി ബന്ധപ്പെട്ട് ഒക്ടോബർ 19-ന് നടക്കാനിരിക്കുന്ന ജനഹിതപരിശോധനയിൽ പുതിയൊരു ചോദ്യം കൂടി ഉൾപ്പെടുത്തുമെന്ന് പ്രീമിയർ ഡാനിയേൽ സ്മിത്ത്. കാനഡയിൽ നിന്ന് വേർപിരിയണമോ എന്നതിലല്ല, മറിച്ച് വേർപിരിയലിനായി ഒരു ‘ബൈൻഡിങ് റഫറണ്ടം’ (തീരുമാനം നടപ്പാക്കാൻ ബാധ്യതയുള്ള വോട്ടെടുപ്പ്) നടത്തുന്നതിനുള്ള നിയമപരമായ നടപടികളിലേക്ക് സർക്കാർ കടക്കണമോ എന്നാണ് പുതിയ ചോദ്യം. കഴിഞ്ഞ ആഴ്ച ‘സ്റ്റേ ഫ്രീ ആൽബർട്ട’ എന്ന സംഘടന കൊണ്ടുവന്ന വേർപിരിയൽ ഹർജി കോടതി റദ്ദാക്കിയ പശ്ചാത്തലത്തിലാണ് സ്മിത്തിന്റെ ഈ തന്ത്രപരമായ നീക്കം. കോടതിയുടെ ഈ തീരുമാനത്തെ “ഒരു ജഡ്ജിക്ക് പറ്റിയ നിയമപരമായ തെറ്റ്” എന്നാണ് പ്രീമിയർ തന്റെ പ്രസംഗത്തിൽ വിശേഷിപ്പിച്ചത്. അപ്പീൽ നടപടികൾക്ക് വർഷങ്ങളെടുക്കുമെന്നതിനാലാണ് ജനങ്ങളുടെ ശബ്ദം കേൾക്കാൻ ഈ വഴി തിരഞ്ഞെടുത്തതെന്നും അവർ കൂട്ടിച്ചേർത്തു. ആൽൽബർട്ട കാനഡയുടെ ഭാഗമായി തുടരുന്നതിനാണ് താൻ വോട്ട് ചെയ്യുകയെന്ന് പ്രീമിയർ ഡാനിയേൽ സ്മിത്ത് വ്യക്തമാക്കി. ജസ്റ്റിൻ ട്രൂഡോയ്ക്ക് ശേഷം മാർക്ക് കാർണി പ്രധാനമന്ത്രിയായതോടെ ഫെഡറൽ സർക്കാരുമായുള്ള ബന്ധം മെച്ചപ്പെട്ടതായും എണ്ണ-ഊർജ്ജ മേഖലകളിൽ അനുകൂലമായ ചർച്ചകൾ നടക്കുന്നതായും സ്മിത്ത് ചൂണ്ടിക്കാണിച്ചു. നമ്മുടെ രാജ്യത്തിന് അനുകൂലമായി കാര്യങ്ങൾ മാറിമറിയുന്ന ഈ സാഹചര്യത്തിൽ കാനഡയെ ഉപേക്ഷിക്കരുതെന്നും അവർ വേർപിരിയലിന്‌ വേണ്ടി വാദിക്കുന്നവരോട്‌ അഭ്യർത്ഥിച്ചു.
എന്നാൽ പ്രീമിയറുടെ ഈ പ്രഖ്യാപനം സ്വന്തം രാഷ്ട്രീയ അടിത്തറയിൽ വലിയ വിള്ളലുണ്ടാക്കിയിട്ടുണ്ട്. വേർപിരിയൽ അനുകൂല സംഘടനയുടെ നിയമോപദേശകനായ ജെഫ് റാത്ത് സ്മിത്തിനെതിരെ കടുത്ത വിമർശനവുമായി രംഗത്തെത്തി. “റഫറണ്ടം നടത്താൻ മറ്റൊരു റഫറണ്ടം നടത്തുകയാണോ? തങ്ങൾക്ക് നൽകിയ വാഗ്ദാനം സ്മിത്ത് ലംഘിച്ചു,” എന്ന് പറഞ്ഞ റാത്ത്, സ്മിത്തിന്റെ നേതൃത്വത്തിനെതിരെ പാർട്ടിയിൽ വോട്ട് ചെയ്യുമെന്നും ഭീഷണിപ്പെടുത്തി. കാനഡയിൽ തുടരണമെന്ന് ആവശ്യപ്പെട്ട് 4 ലക്ഷത്തിലധികം ഒപ്പുകൾ ശേഖരിച്ച മുൻ ഡെപ്യൂട്ടി പ്രീമിയർ തോമസ് ലൂക്കാസുക്കും സ്മിത്തിന്റെ നീക്കത്തെ വിമർശിച്ചു. സ്വന്തം വോട്ട് ബാങ്കിനെ ഭയക്കാതെ രാജ്യത്തിന്റെ നന്മയ്ക്കായി കഠിനമായ തീരുമാനങ്ങൾ എടുക്കുന്നതാണ് നേതൃത്വമെന്ന് അദ്ദേഹം ഓർമ്മിപ്പിച്ചു. ആൽബർട്ടയിലെ തദ്ദേശീയ ജനവിഭാഗമായ ഫസ്‌റ്റ്‌ നേഷൻസും തങ്ങളോട് ആലോചിക്കാതെയാണ് ഇത്തരം നീക്കങ്ങൾ നടത്തുന്നതെന്ന് കുറ്റപ്പെടുത്തി. ഈ വേർപിരിയൽ വാദങ്ങൾ പ്രവിശ്യയിൽ വംശീയതയും ഭിന്നതയും വർദ്ധിപ്പിക്കുകയാണെന്ന് ട്രീറ്റി നമ്പർ 6 ഗ്രാൻഡ് ചീഫ് ജോയി പീറ്റ് പറഞ്ഞു. ഭവനരഹിതർ, തൊഴിലില്ലായ്മ എന്നിവ പരിഹരിക്കുന്നതിലാണ് സർക്കാർ ശ്രദ്ധിക്കേണ്ടതെന്നും അദ്ദേഹം കൂട്ടിച്ചേർത്തു. എഡ്മിന്റൻ മേയർ ആൻഡ്രൂ നാക്കും ഈ റഫറണ്ടത്തെ ശക്തമായി എതിർക്കുമെന്ന് പ്രഖ്യാപിച്ചു. ഈ വേർപിരിയൽ അജണ്ട കാരണം പ്രവിശ്യയിൽ വലിയ സാമ്പത്തിക അനിശ്ചിതത്വം ഉണ്ടാകുമെന്നും ഇത് നിക്ഷേപങ്ങളെയും തൊഴിലവസരങ്ങളെയും ബാധിക്കുമെന്നും മേയർ മുന്നറിയിപ്പ് നൽകി. ആരോഗ്യമേഖലയും വിദ്യാഭ്യാസവും തകർന്നു കിടക്കുമ്പോൾ ഇത്തരം വോട്ടെടുപ്പുകൾ ജനങ്ങളുടെ പണം പാഴാക്കലാണെന്ന് അദ്ദേഹം കുറ്റപ്പെടുത്തി.
