ഒട്ടാവ: കാനഡയിൽ കാൻസർ രോഗികളുടെ എണ്ണം വർദ്ധിക്കുന്നതായി പുതിയ പഠന റിപ്പോർട്ട്. 2026-ൽ മാത്രം രാജ്യത്ത് രണ്ട് ലക്ഷത്തി അൻപതിനായിരത്തിലധികം (2.5 ലക്ഷം) പുതിയ കാൻസർ കേസുകൾ റിപ്പോർട്ട് ചെയ്യപ്പെടുമെന്നും ഏകദേശം 90,000 പേർ രോഗം ബാധിച്ച് മരിക്കാൻ സാധ്യതയുണ്ടെന്നും പഠനം വ്യക്തമാക്കുന്നു. കനേഡിയൻ മെഡിക്കൽ അസോസിയേഷൻ ജേണലിൽ തിങ്കളാഴ്ച പ്രസിദ്ധീകരിച്ച റിപ്പോർട്ടിലാണ് ഈ വിവരങ്ങളുള്ളത്. രാജ്യത്തെ മരണകാരണങ്ങളിൽ കാൻസർ ഇപ്പോഴും ഒന്നാമതായി തുടരുകയാണ്.
കനേഡിയൻ പൗരന്മാരിൽ 42 ശതമാനം പേർക്കും ജീവിതകാലയളവിൽ എപ്പോഴെങ്കിലും കാൻസർ രോഗനിർണ്ണയം നടത്തേണ്ടി വരുമെന്ന് പഠനത്തിന് നേതൃത്വം നൽകിയ എപ്പിഡെമിയോളജിസ്റ്റ് ഡോ. ജെന്നിഫർ ഗില്ലിസ് പറഞ്ഞു. രോഗം കണ്ടെത്താനുള്ള പരിശോധനകളും ചികിത്സാ സൗകര്യങ്ങളും വർദ്ധിച്ചതോടെ മരണനിരക്കിൽ നേരിയ കുറവുണ്ടായിട്ടുണ്ടെങ്കിലും രോഗവ്യാപനം വലിയ വെല്ലുവിളിയായി തുടരുകയാണ്. ശ്വാസകോശ കാൻസറാണ് രാജ്യത്ത് ഏറ്റവും കൂടുതൽ പേർക്ക് റിപ്പോർട്ട് ചെയ്യപ്പെടുന്നത്. ഇതിനുപുറമെ സ്തനാർബുദം, പ്രോസ്റ്റേറ്റ്, വൻകുടൽ കാൻസർ എന്നിവയും വ്യാപകമാണ്.
പുകവലി നിയന്ത്രണങ്ങൾ കാരണം ശ്വാസകോശ കാൻസർ നിരക്ക് കുറയുന്നുണ്ടെങ്കിലും വായുമലിനീകരണവും റാഡൺ വാതകത്തിന്റെ സാന്നിധ്യവും പുതിയ ഭീഷണികളായി മാറുന്നുണ്ട്. കൂടാതെ ഹ്യൂമൻ പാപ്പിലോമ വൈറസ് ബാധ മൂലം ഗർഭാശയ ഗള കാൻസർ, കഴുത്തിലെ കാൻസർ എന്നിവ വർദ്ധിക്കുന്നത് ആരോഗ്യവിദഗ്ധരെ ആശങ്കയിലാഴ്ത്തുന്നു. വാക്സിനേഷൻ നിരക്ക് ഉയർത്തുന്നതിലൂടെ ഇത്തരം രോഗങ്ങൾ തടയാനാകുമെന്ന് ഗവേഷകർ ചൂണ്ടിക്കാട്ടുന്നു. വെസ്റ്റേൺ കാനഡയെ അപേക്ഷിച്ച് ഈസ്റ്റേൺ കാനഡയിലാണ് കാൻസർ നിരക്ക് കൂടുതലായി കാണപ്പെടുന്നത്.
ചെറുപ്പക്കാരിലും കാൻസർ വ്യാപനം ഏറുന്നതായി റിപ്പോർട്ട് പറയുന്നു. വൻകുടൽ കാൻസർ, സ്തനാർബുദം എന്നിവ 50 വയസ്സിന് താഴെയുള്ളവരിൽ വർദ്ധിച്ചുവരികയാണ്. അതിനാൽ രോഗനിർണ്ണയത്തിനുള്ള പ്രായപരിധി കുറയ്ക്കണമെന്നും പരിശോധനകൾ നേരത്തെ തന്നെ ആരംഭിക്കണമെന്നും കനേഡിയൻ കാൻസർ സൊസൈറ്റി ആവശ്യപ്പെട്ടു. കാൻസർ പ്രതിരോധം, നേരത്തെയുള്ള രോഗനിർണ്ണയം, നൂതന ചികിത്സാ രീതികൾ എന്നിവയിൽ കൂടുതൽ നിക്ഷേപം നടത്തേണ്ടത് അത്യന്താപേക്ഷിതമാണെന്ന് ഡോ. ഗില്ലിസ് ഓർമ്മിപ്പിച്ചു. കാനഡയിലെ ഈ ആരോഗ്യപ്രതിസന്ധി പരിഹരിക്കാൻ സർക്കാരും ആരോഗ്യ ഏജൻസികളും സംയുക്തമായ നീക്കം നടത്തേണ്ടതുണ്ടെന്ന് റിപ്പോർട്ട് അടിവരയിടുന്നു.
