ഒട്ടാവ: കാനഡയിലെ പലചരക്ക് സാധനങ്ങളുടെ വിലയിൽ ഫെബ്രുവരി മാസത്തിൽ വൻ വർദ്ധനവ് രേഖപ്പെടുത്തിയതായി സ്റ്റാറ്റിസ്റ്റിക്സ് കാനഡയുടെ പുതിയ റിപ്പോർട്ട്. രാജ്യത്തെ പൊതുവായ പണപ്പെരുപ്പ നിരക്കിനേക്കാൾ വേഗത്തിലാണ് ഭക്ഷണസാധനങ്ങളുടെ വില ഉയരുന്നത്. 105 സാധാരണ പലചരക്ക് സാധനങ്ങളെ അടിസ്ഥാനമാക്കി നടത്തിയ പഠനത്തിൽ, മുൻവർഷത്തെ അപേക്ഷിച്ച് ചിക്കൻ, കാപ്പി, ബീഫ് എന്നിവയുടെ വിലയിലാണ് ഏറ്റവും വലിയ കുതിച്ചുചാട്ടം ഉണ്ടായതെന്ന് സി.ടി.വി ന്യൂസ് റിപ്പോർട്ട് ചെയ്യുന്നു.

വില വർദ്ധനവിൽ ശതമാനക്കണക്കിൽ ഒന്നാമത് നിൽക്കുന്നത് കോഴിയാണ്. ഒരു കിലോ കോഴിക്ക് ഫെബ്രുവരിയിൽ 43.8 ശതമാനം വില വർദ്ധിച്ച് ശരാശരി 8.57 ഡോളറിലെത്തി. കഴിഞ്ഞ വർഷം ഇതേസമയത്ത് ഇത് 5.96 ഡോളറായിരുന്നു. കാപ്പിയുടെ വിലയിൽ 29.9 ശതമാനം വർദ്ധനവുണ്ടായി. 340 ഗ്രാം പാക്കറ്റിന് ഇപ്പോൾ 9.51 ഡോളർ നൽകണം. ബീഫ് ഉൽപ്പന്നങ്ങൾക്കും വലിയ വില വർദ്ധനവാണ് രേഖപ്പെടുത്തിയത്. ബീഫ് സ്ട്രിപ്പ്‌ലോയിൻ കട്ടുകൾക്ക് കിലോയ്ക്ക് 7.51 ഡോളർ വർദ്ധിച്ച് 35.56 ഡോളറായി. കൂടാതെ സെലറി (22.6%), കുക്കുംബർ (22.1%), ഐസ്ബർഗ് ലെറ്റൂസ് (19.1%) എന്നിവയുടെ വിലയും കാര്യമായി ഉയർന്നു.

പ്രവിശ്യകൾ തിരിച്ചുള്ള കണക്കുകൾ പരിശോധിക്കുമ്പോൾ മരിടൈംസ് മേഖലയിലാണ് ഏറ്റവും വലിയ വിലക്കയറ്റം ദൃശ്യമായത്. നോവ സ്കോഷിയ (8.5%), പ്രിൻസ് എഡ്വേർഡ് ഐലൻഡ് (7.2%), ന്യൂ ബ്രൺസ്‌വിക്ക് (7.0%) എന്നിവിടങ്ങളിൽ കാനഡയുടെ ശരാശരി പണപ്പെരുപ്പത്തേക്കാൾ ഉയർന്ന നിരക്കാണ് രേഖപ്പെടുത്തിയത്. അതേസമയം, ഒന്റാറിയോയിൽ മാത്രമാണ് ദേശീയ ശരാശരിയേക്കാൾ (692.50 ഡോളർ) കുറഞ്ഞ നിരക്കിൽ ഒരു മാസത്തെ പലചരക്ക് സാധനങ്ങൾ വാങ്ങാൻ കഴിയുന്നത്. ഒന്റാറിയോയിലെ ഒരു ശരാശരി ഷോപ്പിംഗ് കാർട്ടിന് 690.93 ഡോളറാണ് ചിലവ് വരുന്നത്.

എല്ലാ സാധനങ്ങൾക്കും വില വർദ്ധിച്ചിട്ടില്ല എന്നത് ആശ്വാസകരമാണ്. കാന്റലൂപ്പുകൾക്ക് 28.9 ശതമാനം വില കുറഞ്ഞു. ഒലിവ് ഓയിൽ (18.5%), പിയേഴ്സ് (17.9%), ഓറഞ്ച് (17.6%) എന്നിവയുടെ വിലയിലും ഇടിവുണ്ടായി. പീനട്ട് ബട്ടർ, മയോണൈസ് എന്നിവയുടെ വിലയിൽ മാറ്റമില്ലാതെ തുടർന്നു. മിഡിൽ ഈസ്റ്റിലെ സംഘർഷങ്ങൾ കാരണം ഇന്ധനവില വർദ്ധിക്കുന്നത് വരും മാസങ്ങളിലും ഭക്ഷണസാധനങ്ങളുടെ വില ഉയർത്താൻ കാരണമായേക്കുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. ശമ്പള വർദ്ധനവിനേക്കാൾ വേഗത്തിൽ ഭക്ഷണച്ചെലവ് ഉയരുന്നത് കനേഡിയൻ കുടുംബങ്ങളുടെ സാമ്പത്തിക സുരക്ഷിതത്വത്തെ ബാധിക്കുന്നുണ്ട്.