കാൽഗറി: നോർത്ത് ഈസ്റ്റ് കാൽഗറിയിൽ 11 വയസ്സുകാരനെ തട്ടിക്കൊണ്ടുപോകാൻ ശ്രമം. കോവെൻട്രി ഹിൽസ് സ്‌കൂളിന് സമീപമുള്ള നടപ്പാതയിൽ കഴിഞ്ഞ വെള്ളിയാഴ്ച വൈകുന്നേരമാണ് സംഭവം നടന്നത്. സൈക്കിൾ ചവിട്ടുകയായിരുന്ന ബാലനെ അക്രമി ബലമായി പിടിച്ചുകൊണ്ടുപോകാൻ ശ്രമിക്കുകയായിരുന്നു. എന്നാൽ കുട്ടി ഇയാളുടെ പിടിയിൽ നിന്ന് സാഹസികമായി കുതറിമാറി രക്ഷപ്പെട്ടു.

സംഭവത്തെക്കുറിച്ച് പോലീസ് പറയുന്നത് ഇങ്ങനെ: വെള്ളിയാഴ്ച വൈകുന്നേരം ആറിനും ഏഴിനും ഇടയിലാണ് സംഭവം നടന്നത്. പ്രതിയുടെ പിടിയിൽ നിന്ന് രക്ഷപ്പെട്ട കുട്ടി സുരക്ഷിതനായി വീട്ടിലെത്തുകയും മാതാപിതാക്കളെ വിവരമറിയിക്കുകയുമായിരുന്നു. തുടർന്ന് വീട്ടുകാർ ഉടൻ തന്നെ പോലീസിൽ പരാതി നൽകി. സംഭവത്തിൽ പ്രതിക്കായി പോലീസ് അന്വേഷണം ഊർജ്ജിതമാക്കിയിട്ടുണ്ട്.

പ്രതിയുടെ അടയാളങ്ങൾ

പ്രായം: ഏകദേശം 20 വയസ്സ്.
ഉയരം: 5 അടി 6 ഇഞ്ച്.
വേഷം: ഗ്രേ ഹുഡിയും കറുത്ത സ്വെറ്റ്പാൻ്റ്സും വെളുത്ത ഷൂസും.

പ്രദേശത്ത് നടന്നത് ഒറ്റപ്പെട്ട സംഭവമാണെന്നാണ് പോലീസിന്റെ പ്രാഥമിക നിഗമനം. എങ്കിലും രക്ഷിതാക്കൾ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. സംഭവസമയത്ത് ആ പരിസരത്തുണ്ടായിരുന്നവരോ, സിസിടിവി (CCTV), ഡാഷ്‌ക്യാം (Dashcam) ദൃശ്യങ്ങൾ കൈവശമുള്ളവരോ ഉടൻ തന്നെ പോലീസിനെ വിവരമറിയിക്കണം. വിവരങ്ങൾ നൽകുന്നവരുടെ പേരുവിവരങ്ങൾ രഹസ്യമായി സൂക്ഷിക്കുമെന്നും പോലീസ് വ്യക്തമാക്കി.