വ്യാപാരത്തിലും ടൂറിസത്തിലും ശക്തമായ പങ്കാളിത്തം ഉറപ്പാക്കാൻ ഒരുങ്ങുകയാണ് ആൽബർട്ടയും യുണൈറ്റഡ് അറബ് എമിറേറ്റ്സും. ലോകത്തിൽ ഏറ്റവും വേഗത്തിൽ വളരുന്ന പ്രദേശങ്ങളിലൊന്നായ മിഡിൽ ഈസ്റ്റിലേക്ക് ആൽബർട്ടയിൽ നിന്നുള്ള സന്ദർശകർക്കും നിക്ഷേപകർക്കും ബിസിനസ്സുകാർക്കും അവസരങ്ങൾ തുറന്നിരിക്കുകയാണ് യുഎഇ. ഇതിന്‍റെ ഭാഗമായി അബുദാബി-കാൽഗറി വിമാന സർവീസ് ആരംഭിക്കുമെന്ന് ഇത്തിഹാദ് എയർവേയ്‌സ് അറിയിച്ചു. 2026 നവംബർ 3 മുതൽ, ഇരുനഗരങ്ങൾക്കുമിടയിൽ ഇത്തിഹാദ് ആഴ്ചയിൽ നാല് തവണ സർവീസ് നടത്തും.
യുഎഇയുടെ തലസ്ഥാനമെന്ന നിലയിൽ, അബുദാബി ബിസിനസ്, നിക്ഷേപം എന്നിവയ്ക്കുള്ള ഒരു പ്രധാന കേന്ദ്രമാണെന്ന് ആൽബർട്ട പ്രീമിയർ ഡാനിയേൽ സ്മിത്ത് പറഞ്ഞു. നിക്ഷേപത്തിലും ടൂറിസത്തിലും ദീർഘകാല വളർച്ചയ്ക്കായി ആൽബർട്ട സർക്കാർ അബുദാബിയിൽ പുതിയ ഓഫീസ് തുറന്നിരുന്നു. ഇതിലൂടെ മന്ത്രിമാരുമായും ഉദ്യോഗസ്ഥരുമായും വ്യവസായികളുമായും ബന്ധം ശക്തിപ്പെടുത്തിയതായി ആൽബർട്ടയും യുണൈറ്റഡ് അറബ് എമിറേറ്റ്സും തമ്മിൽ വ്യാപാര പങ്കാളിത്തത്തിൽ പുരോഗതി കൈവരിച്ചതായും പ്രീമിയർ അറിയിച്ചു. 2024-ൽ, യുണൈറ്റഡ് അറബ് എമിറേറ്റുകളിലേക്കുള്ള ആൽബർട്ടയുടെ കയറ്റുമതി 248 മില്യൺ ഡോളറായിരുന്നു. അതിൽ പ്രധാനമായും കനോല വിത്ത്, യന്ത്രങ്ങൾ, മെക്കാനിക്കൽ ഉപകരണങ്ങൾ, ഗോതമ്പ്, പയർ എന്നിവ ഉൾപ്പെടുന്നു.
