യുഎസ് മദ്യ ശേഖരം വിറ്റ് അതിന്റെ ലാഭം ചാരിറ്റി പ്രവർത്തനങ്ങൾക്ക് നൽകാൻ നിലവിൽ പദ്ധതിയില്ലെന്ന് ഒന്റാരിയോ പ്രീമിയർ ഡഗ് ഫോർഡ്. അവധിക്കാലത്ത് ഈ മദ്യം വിൽക്കുന്നത് പ്രാദേശിക മദ്യ ഉൽപാദകരെ ദോഷകരമായി ബാധിക്കുമെന്നതിനാലാണ് തീരുമാനമെന്നും പ്രീമിയർ വ്യക്തമാക്കി. ഏകദേശം 8 കോടി ഡോളർ വിലമതിക്കുന്ന അമേരിക്കൻ മദ്യമാണ് നിലവിൽ ശേഖരത്തിലുള്ളത്. ഇതിൽ 20 ലക്ഷം ഡോളർ മൂല്യമുള്ള മദ്യത്തിന് അടുത്ത ആറുമാസത്തിനുള്ളിൽ കാലാവധി തീരാൻ സാധ്യതയുണ്ട്. മദ്യം പ്രവിശ്യക്ക് പുറത്ത് വിൽക്കാൻ കഴിയുമെങ്കിൽ, ചാരിറ്റിക്ക് വേണ്ടി ഈ നീക്കം പരിഗണിക്കാമെന്ന് പ്രീമിയർ പറഞ്ഞു.
എന്നാൽ, ഈ മദ്യ ശേഖരം വിറ്റ് ചാരിറ്റിക്ക് സംഭാവന നൽകണമെന്ന് ഒന്റാരിയോ ലിബറൽ പാർട്ടി സർക്കാരിനോട് നിരന്തരം ആവശ്യപ്പെടുന്നുണ്ട്. കനേഡിയൻ ഉൽപ്പന്നങ്ങൾക്ക് യുഎസ് പ്രസിഡന്റ് ഡോണൾഡ് ട്രംപ് തീരുവ ഏർപ്പെടുത്തിയതിന് മറുപടിയായി, കഴിഞ്ഞ മാർച്ചിലാണ് ഫോർഡ് സർക്കാർ അമേരിക്കൻ മദ്യം LCBO ഷെൽഫുകളിൽ നിന്ന് നീക്കം ചെയ്തത്.
