ആൽബർട്ടയിൽ പകർച്ചപ്പനി കേസുകൾ വർധിക്കുന്നു. ഈ വർഷം ആൽബർട്ടയിൽ പകർച്ചപ്പനി കേസുകളിൽ പതിവിലും വർധനയാണ് ഉണ്ടായിട്ടുള്ളത്. അവധിക്കാലം ആരംഭിക്കുമ്പോൾ തന്നെ ധാരാളം ആളുകൾക്ക് അസുഖം ബാധിക്കുന്നുണ്ടെന്ന് ആരോഗ്യ വിദഗ്ധർ പറയുന്നു. ഓസ്‌ട്രേലിയയിലെ പകർച്ചപ്പനിയുടെ ട്രെൻഡുകൾ പലപ്പോഴും ഇവിടെ എന്ത് സംഭവിക്കുമെന്ന് പ്രവചിക്കാറുണ്ടെന്ന് സാംക്രമിക രോഗ വിദഗ്ധനായ ഡോ. ഐസക് ബോഗോച്ച് മുന്നറിയിപ്പ് നൽകുന്നു. ഓസ്‌ട്രേലിയയിൽ തുടർച്ചയായി രണ്ട് കഠിനമായ ഫ്ലൂ സീസണുകൾ ഉണ്ടായത് ആൽബർട്ടയിലും ആശങ്ക വർദ്ധിപ്പിക്കുന്നുണ്ട്. ആൽബർട്ടയിൽ ഇതുവരെ 2,000-ത്തിലധികം ഫ്ലൂ കേസുകൾ സ്ഥിരീകരിച്ചിട്ടുണ്ട്. ഇതിൽ 519 പേരെ ആശുപത്രിയിൽ പ്രവേശിപ്പിച്ചു, 31 പേർ തീവ്രപരിചരണ വിഭാഗത്തിലാണ്. കാൽഗറിയിൽ മാത്രം 1,000-ത്തിലധികം കേസുകളാണ് റിപ്പോർട്ട് ചെയ്തത്.

ഈ വർഷത്തെ ഫ്ലൂ വാക്‌സിൻ H1N1, H3N2 എന്നീ രണ്ട് ഫ്ലൂ വകഭേദങ്ങൾക്കെതിരെയും സംരക്ഷണം നൽകുന്നുണ്ട്. H1N1 സീസണേക്കാൾ ഗുരുതരമാവാൻ സാധ്യതയുള്ളത് H3N2 സീസണുകളാണെന്ന് വിദഗ്ധർ പറയുന്നു.അവധിക്കാലത്തെ ഒത്തുചേരലുകൾ, ഷോപ്പിംഗ്, ഇൻഡോർ പരിപാടികൾ എന്നിവ ഫ്ലൂ കൂടുതൽ വേഗത്തിൽ വ്യാപിക്കാൻ കാരണമാകുന്നുണ്ട്. അതിനാൽ വാക്സിൻ എടുക്കാനും, കൈ കഴുകാനും, ഹ്യുമിഡിഫയറുകൾ ഉപയോഗിക്കുന്നത് പോലുള്ള ലളിതമായ മുൻകരുതലുകൾ എടുക്കാനും ഫാർമസിസ്റ്റുകൾ പൊതുജനങ്ങളോട് അഭ്യർത്ഥിച്ചു. ഫ്ലൂ ഷോട്ടുകൾ സൗജന്യമാണെന്നും മുൻകൂട്ടി അപ്പോയിൻ്റ്മെൻ്റ് ഇല്ലാതെ വന്ന് എടുക്കാവുന്നതാണെന്നും അവർ വ്യക്തമാക്കി.