ഓട്ടവയിൽ അഞ്ചാംപനി വീണ്ടും അഞ്ചാംപനി പടരുന്നു. അഞ്ചാംപനി ബാധ ആശങ്ക ഉയർന്ന സാഹചര്യത്തിൽ ആരാധനാലയങ്ങൾ സന്ദർശിച്ചവർ ജാഗ്രത പുലർത്തണമെന്ന് ഓട്ടവ പബ്ലിക് ഹെൽത്ത് മുന്നറിയിപ്പ് നൽകി. ഒക്ടോബർ 12 ഞായറാഴ്ച രാവിലെ 10:20 നും ഉച്ചയ്ക്ക് 2 നും ഇടയിൽ 528 ഓൾഡ് സെന്റ് പാട്രിക് സ്ട്രീറ്റിലുള്ള സെന്റ് ആനി പള്ളിയിലെ സെന്റ് ക്ലെമന്റ് ഇടവകയിൽ എത്തിയവർക്കാണ് ജാഗ്രതാ നിർദ്ദേശം. സെപ്റ്റംബർ 29 തിങ്കളാഴ്ച മുതൽ ഒക്ടോബർ 2 വ്യാഴാഴ്ച വരെ രാവിലെ 9 നും 12 നും ഇടയിൽ 415 പിക്കാഡിലി അവന്യൂവിലുള്ള സെന്റ് ജോർജ്ജ് ഇടവകയിലെത്തിയവർക്കും അണുബാധയ്ക്ക് സാധ്യതയുണ്ട്. ഈ സ്ഥലങ്ങളുമായി ബന്ധപ്പെട്ട് അഞ്ചുകേസുകളുടെ വിവരങ്ങൾ അന്വേഷിച്ചു വരികയാണെന്ന് അധികൃതർ പറഞ്ഞു.
മുകളിൽ പറഞ്ഞ സമയങ്ങളിൽ ഈ രണ്ട് സ്ഥലങ്ങൾ സന്ദർശിച്ചവർ 21 ദിവസത്തേക്ക് അഞ്ചാംപനി ലക്ഷണങ്ങൾ നിരീക്ഷിക്കണം. കടുത്ത പനി, ചുമ, മൂക്കൊലിപ്പ്, വായിൽ വെളുത്ത പാടുകൾ, കണ്ണ് ചുവക്കുകയും വെള്ളം വരികയും ചെയ്യുക എന്നതാണ് അഞ്ചാംപനി രോഗലക്ഷണങ്ങൾ. ലക്ഷണങ്ങൾ പ്രത്യക്ഷപ്പെട്ട് കുറച്ച് ദിവസങ്ങൾക്ക് ശേഷം, സാധാരണയായി മുഖത്ത് ചുവന്ന പാടുകൾ പ്രത്യക്ഷപ്പെടുകയും ശരീരത്തിലുടനീളം വ്യാപിക്കുകയും ചെയ്യും.
