ഓട്ടവ: കാനഡ റവന്യൂ ഏജൻസിക്കെതിരെ രൂക്ഷ വിമർശനവുമായി കാനഡയുടെ ഓഡിറ്റർ ജനറൽ. കാനഡ റവന്യൂ ഏജൻസിയുടെ (CRA) കോൾ സെൻ്ററുകളിലെ മോശം സേവനത്തെയും കൃത്യതയില്ലാത്ത വിവരങ്ങളെയും ഓഡിറ്റർ ജനറൽ കാരൻ ഹോഗൻ രൂക്ഷമായിa വിമർശിച്ചു.
റിപ്പോർട്ട് പ്രകാരം, 2024–25-ൽ, CRA നിശ്ചയിച്ച 15 മിനിറ്റ് സമയപരിധിക്കുള്ളിൽ മറുപടി നൽകിയത് മൊത്തം കോളുകളുടെ 18 ശതമാനത്തിന് മാത്രമാണ്. ലക്ഷ്യമിട്ട 65 ശതമാനത്തേക്കാൾ വളരെ കുറവാണിത്. ജൂൺ മാസത്തിൽ, അഞ്ച് ശതമാനത്തിൽ താഴെ കോളുകൾക്ക് മാത്രമാണ് ഇത്രയും വേഗത്തിൽ മറുപടി ലഭിച്ചത്.

ഓഡിറ്റർ ജനറലിൻ്റെ ഓഫീസ് നടത്തിയ ടെസ്റ്റ് കോളുകളിൽ, ഒരു ഏജൻ്റുമായി സംസാരിക്കാൻ ശരാശരി 33 മിനിറ്റ് കാത്തിരിക്കേണ്ടി വന്നു. ലഭിച്ച മറുപടികൾ പലപ്പോഴും തെറ്റും ആയിരുന്നു. വ്യക്തിഗത നികുതി സംബന്ധിച്ച ചോദ്യങ്ങൾക്ക് ഏജൻ്റുമാർ കൃത്യമായ മറുപടി നൽകിയത് 17 ശതമാനം തവണ മാത്രമാണ്. CRA-യുടെ ചാറ്റ്‌ബോട്ടിൻ്റെ കാര്യവും വിശ്വസനീയമായിരുന്നില്ല; മൂന്നിലൊന്ന് ചോദ്യങ്ങൾക്ക് മാത്രമേ ഇത് ശരിയായ മറുപടി നൽകിയിട്ടുള്ളൂ. ഓഡിറ്റർ ജനറലിൻ്റെ വിമർശനങ്ങളെ തുടർന്ന് കൂടുതൽ ജീവനക്കാരെ നിയമിക്കാനും കൂടുതൽ കോളുകൾക്ക് മറുപടി നൽകാനുമായി 100 ദിവസത്തെ പദ്ധതിക്ക് CRA തുടക്കമിട്ടു.

സൈനിക റിക്രൂട്ട്‌മെൻ്റിലെ വലിയ കാലതാമസവും നീണ്ട പ്രോസസ്സിംഗ് സമയവും സൈനികർക്കുള്ള മോശം താമസ സൗകര്യങ്ങളും ഓഡിറ്റർ ജനറലിൻ്റെ റിപ്പോർട്ടിൽ എടുത്തുപറഞ്ഞു. കനേഡിയൻ ആംഡ് ഫോഴ്‌സസിലെ ആയിരക്കണക്കിന് അംഗങ്ങൾ ഭവനത്തിനായി കാത്തിരിക്കുമ്പോൾ, 205 ഭവന യൂണിറ്റുകൾ മാത്രമാണ് നിലവിലുള്ളതെന്നും AG കണ്ടെത്തി.