ഓട്ടവ: ഫെഡറൽ ഗവൺമെന്റിന്റെ പ്രവർത്തനങ്ങളിലും സേവനങ്ങളിലും ആർട്ടിഫിഷ്യൽ ഇന്റലിജൻസ് അവതരിപ്പിക്കുന്നത് പൊതുസേവന രംഗത്ത് ജോലി വെട്ടിക്കുറയ്ക്കുന്നതിന് കാരണമാകുമെന്ന് കാനഡയിലെ ചീഫ് ഡാറ്റ ഓഫീസർ സ്റ്റീഫൻ ബർട്ട്. ഇതിന്റെ ആഘാതങ്ങൾ വ്യാപകമായി വ്യത്യാസപ്പെടുമെന്നും വ്യത്യസ്ത മേഖലകളിൽ വ്യത്യസ്ത ഫലങ്ങൾ ഉണ്ടാകുമെന്നും അവ ജോലിയെ ആശ്രയിച്ചിരിക്കുമെന്നും ദേശീയ മാധ്യമത്തിന് നൽകിയ അഭിമുഖത്തിൽ അദ്ദേഹം പറഞ്ഞു.
സർക്കാരിന്റെ പ്രത്യേക മേഖലകളിലെ തൊഴിൽ നഷ്ടത്തിന്റെ അപകടസാധ്യതകൾ സംബന്ധിച്ച് ഒന്നും വ്യക്തമാക്കിയില്ലെങ്കിലും ജീവനക്കാർക്ക് വീണ്ടും പരിശീലനം നൽകാനും ജോലി മാറാനുമുള്ള അവസരങ്ങൾ ഉറപ്പാക്കുക എന്നതാണ് ലക്ഷ്യമെന്ന് ബർട്ട് വിശദീകരിച്ചു.
ഓഗസ്റ്റിൽ പൊതുസേവന പ്രവർത്തനങ്ങൾ മെച്ചപ്പെടുത്താൻ എഐയ്ക്ക് കഴിയുന്ന മേഖലകൾ തിരിച്ചറിയുന്നതിനായി ഫെഡറൽ സർക്കാർ കനേഡിയൻ ആർട്ടിഫിഷ്യൽ ഇന്റലിജൻസ് കമ്പനിയായ കോഹെറുമായി കരാറിൽ ഒപ്പുവെച്ചിരുന്നു. കൃത്രിമ ബുദ്ധിയുടെ വർധിച്ചുവരുന്ന ഉപയോഗത്തെക്കുറിച്ച് കനേഡിയൻ പൗരന്മാർക്ക് ബോധവത്കരണം നടത്തുന്നതിനായി ഇതിനകം നടന്നുകൊണ്ടിരിക്കുന്ന എഐ പ്രോജക്ടുകൾ ട്രാക്ക് ചെയ്യാൻ സഹായിക്കുന്നതിനുമായി ഒരു പൊതു രജിസ്ട്രി ആരംഭിക്കാൻ പദ്ധതിയിടുന്നതായി സർക്കാർ അറിയിച്ചിട്ടുണ്ട്.
