ഓട്ടവ: ഭരണതലത്തിലെ ചുവപ്പുനാട ഒഴിവാക്കാൻ മന്ത്രിമാർ ഏകദേശം 500 വഴികൾ കണ്ടെത്തിയതായി കനേഡിയൻ ട്രഷറി ബോർഡ് പ്രസിഡൻ്റ് ഷഫ്ഖാത് അലി. എല്ലാ സർക്കാർ നിയന്ത്രണങ്ങളും അവലോകനം ചെയ്യാൻ പ്രധാനമന്ത്രി മാർക്ക് കാർണി ജൂലൈയിൽ ഉത്തരവിട്ടിരുന്നു. ഇതിൻ്റെ ഭാഗമായാണ് പ്രവർത്തനങ്ങൾ വിലയിരുത്തിയത്. സർക്കാരിൻ്റെ പ്രവർത്തനങ്ങൾ വേഗത്തിലും കാര്യക്ഷമവുമാക്കുക എന്നതാണ് മാറ്റങ്ങളിലൂടെ ലക്ഷ്യമിടുന്നത്.
വിവിധ വകുപ്പുകളിലുടനീളം കൈവരിച്ച നേട്ടങ്ങൾ വ്യക്തമാക്കിയുള്ള റിപ്പോർട്ടും ഫെഡറൽ ഗവൺമെൻ്റ് പുറത്ത് വിട്ടു. അടിസ്ഥാന സൗകര്യ പദ്ധതികൾ വേഗത്തിലാക്കാനും മരുന്നുകൾ, കാർഷിക ഉൽപ്പന്നങ്ങൾ തുടങ്ങിയ ഉൽപ്പന്നങ്ങൾ വിപണികളിൽ വേഗത്തിൽ എത്തിക്കാനും കൈക്കൊണ്ട നടപടികൾ റിപ്പോർട്ടിലുണ്ട്. പ്രധാന പദ്ധതികളിൽ വേഗത്തിൽ തീരുമാനങ്ങൾ എടുക്കുന്നതിനായി കാനഡയിലെ ഇംപാക്റ്റ് അസസ്മെൻ്റ് ഏജൻസി അതിൻ്റെ നടപടിക്രമങ്ങൾ ലളിതമാക്കിയിട്ടുണ്ട്. പൈപ്പ്ലൈൻ സംബന്ധിച്ച തീരുമാനങ്ങൾ എടുക്കുന്നതിനുള്ള സമയം 191 ദിവസത്തിൽ നിന്ന് 79 ആയി കുറയ്ക്കും.
കനേഡിയൻ ഫുഡ് ഇൻസ്പെക്ഷൻ ഏജൻസി, ന്യൂക്ലിയർ സേഫ്റ്റി കമ്മീഷൻ തുടങ്ങിയ മറ്റ് ഏജൻസികൾ കാലതാമസം കുറയ്ക്കുന്നതിനും പണം ലാഭിക്കുന്നതിനുമായി ആഗോള മാനദണ്ഡങ്ങൾ പാലിക്കാൻ തീരുമാനമായി. കനേഡിയൻ കമ്പനികളെ ആഗോളതലത്തിൽ മത്സരിക്കാൻ സഹായിക്കുന്നതിന് ട്രാൻസ്പോർട്ട് കാനഡ അന്താരാഷ്ട്ര ഗ്രൂപ്പുകളുമായി ചേർന്ന് പ്രവർത്തിക്കുന്നതായും റിപ്പോർട്ടിലുണ്ട്.
