ഓട്ടവ: മനോഹരമായൊരു അവധിക്കാലം പ്ലാൻ ചെയ്യുന്നവർ ഡെസ്റ്റിനേഷനുകൾ തെരഞ്ഞെടുക്കുമ്പോൾ അതീവ ജാഗ്രത പാലിക്കണമെന്ന് മുന്നറിയിപ്പ് നൽകി കാനഡ. ഏഷ്യയിലെ നിരവധി സ്ഥലങ്ങളിലേക്ക് യാത്ര ചെയ്യുന്ന കനേഡിയൻ പൗരന്മാർക്കാണ് യാത്രാ ഉപദേശം പുറപ്പെടുവിച്ചിരിക്കുന്നത്.
സുരക്ഷയ്ക്കായി അന്താരാഷ്ട്ര തലത്തിൽ യാത്ര ആസൂത്രണം ചെയ്യുന്നവർ രജിസ്ട്രേഷൻ ഓഫ് കനേഡിയൻസ് എബ്രോഡ്(ROCA) എന്നതിൽ സൈൻ അപ്പ് ചെയ്യണമെന്ന് അധികൃതർ അറിയിച്ചു. ഇത് വിദേശത്തേക്ക് യാത്ര ചെയ്യുന്ന കനേഡിയൻ പൗരന്മാർക്ക് അടിയന്തരാവസ്ഥയെ കുറിച്ചോ അല്ലെങ്കിൽ മറ്റ് ആഭ്യന്തര പ്രശ്നങ്ങളെക്കുറിച്ചോ അപ്ഡേറ്റുകൾ നൽകുവാൻ സഹായിക്കുന്നു.
രാഷ്ട്രീയ, ആഭ്യന്തര സംഘർഷങ്ങൾ, കലാപങ്ങൾ, വെള്ളപ്പൊക്കം, മഴ തുടങ്ങിയ പ്രകൃതി ദുരന്തങ്ങൾ തുടങ്ങിയ കാരണം വിയറ്റ്നാം, തായ്ലൻഡ്, ലാവോസ്, കംബോഡിയ എന്നീ രാജ്യങ്ങളിലേക്കുള്ള യാത്ര ഒഴിവാക്കാനും യാത്ര ചെയ്യുന്നവർ അതീവ ജാഗ്രത പാലിക്കാനുമാണ് കനേഡിയൻ സർക്കാർ നിർദ്ദേശിക്കുന്നത്.
