പുതിയ കരാറിനായി കാനഡ പോസ്റ്റ് മുന്നോട്ടു വെച്ച ഓഫറിൽ തിങ്കളാഴ്ച മുതൽ പോസ്റ്റൽ ജീവനക്കാർ വോട്ട് ചെയ്യുമെന്ന് യൂണിയൻ അറിയിച്ചു. വേതന വർധനയും ആഴ്ചയിൽ ഏഴ് ദിവസത്തെ ഡെലിവറി നടപ്പിലാക്കാൻ ലക്ഷ്യമിട്ടുള്ള മാറ്റങ്ങളും അടങ്ങുന്ന പുതിയ ഓഫറിൽ ജൂലൈ 21 മുതൽ ഓഗസ്റ്റ് 1 വരെ ആയിരിക്കും വോട്ടിങ് നടക്കുക. കാനഡ പോസ്റ്റുമായുള്ള കരാർ ചർച്ചകൾ വഴിമുട്ടിയതോടെ മാസങ്ങളായി ഏകദേശം 55,000 തപാൽ ജീവനക്കാരെ പ്രതിനിധീകരിക്കുന്ന യൂണിയൻ, കനേഡിയൻ യൂണിയൻ ഓഫ് പോസ്റ്റൽ വർക്കേഴ്‌സ് പണിമുടക്കിലാണ്. പ്രതിസന്ധി രൂക്ഷമായ സാഹചര്യത്തിൽ ഫെഡറൽ തൊഴിൽമന്ത്രി പാറ്റി ഹജ്ദു കഴിഞ്ഞ മാസം കാനഡ ഇൻഡസ്ട്രിയൽ റിലേഷൻസ് ബോർഡിനോട് ഇടപെടാനും കാനഡ പോസ്റ്റിന്‍റെ ഏറ്റവും പുതിയ ഓഫറിൽ വോട്ടെടുപ്പ് നടത്താനും നിർദ്ദേശിച്ചിരുന്നു.
യൂണിയൻ കാനഡ ഇൻഡസ്ട്രിയൽ റിലേഷൻസ് ബോർഡിന്‍റെ നിർദ്ദേശത്തിൽ വോട്ട് ചെയ്യാൻ ജീവനക്കാരോട് അഭ്യർത്ഥിക്കുകയും ഓവർടൈമിന് ദേശീയ നിരോധനം ഏർപ്പെടുത്തുകയും ചെയ്തിട്ടുണ്ട്. അതേസമയം കൂടുതൽ മെച്ചപ്പെട്ട ഒരു കരാറിനായി യൂണിയൻ സമ്മർദ്ദം ചെലുത്തുന്നത് തുടരുകയാണ്.
