സ്റ്റാറ്റിസ്റ്റിക്സ് കാനഡയിൽ നിന്നുള്ള അറിയിപ്പ്
ഓരോ അഞ്ച് വർഷം കൂടുമ്പോഴും ജനസംഖ്യാ കണക്കെടുപ്പിൽ (സെൻസസ്) പങ്കാളികളാകാൻ കനേഡിയൻ നിവാസികൾ ക്ഷണിക്കപ്പെടുന്നു. കാനഡയുടെ അടുത്ത ജനസംഖ്യാ സെൻസസ് 2026 മേയ് മാസത്തിൽ നടക്കും.
കാനഡയിലുടനീളമുള്ള കുടുംബങ്ങളിൽ നിന്ന് ജനസംഖ്യാപരവും സാമൂഹികവും സാമ്പത്തികവുമായ വിവരങ്ങൾ ശേഖരിക്കുന്നതിലൂടെ, രാജ്യത്തെ വൈവിധ്യമാർന്ന ജനവിഭാഗങ്ങളെക്കുറിച്ചും നാം ജീവിക്കുന്ന പ്രദേശങ്ങളെക്കുറിച്ചും വ്യക്തമായ ഒരു സ്ഥിതിവിവര ചിത്രം തയ്യാറാക്കാൻ സെൻസസ് സഹായിക്കുന്നു.
കനേഡിയൻ കുടുംബങ്ങളെയും അയൽപക്കങ്ങളെയും ബിസിനസ്സുകളെയും ബാധിക്കുന്ന പ്രധാനപ്പെട്ട തീരുമാനങ്ങൾ എടുക്കുന്നതിന് ആവശ്യമായ വിവരങ്ങൾക്കായി കാനഡക്കാർ ആശ്രയിക്കുന്നത് സെൻസസ് ഡാറ്റയെയാണ്. നിങ്ങൾ നൽകുന്ന വിവരങ്ങൾ കാനഡയിലെ മാറിക്കൊണ്ടിരിക്കുന്ന സാമൂഹികാവസ്ഥയെ സെൻസസ് കൃത്യമായി പ്രതിഫലിപ്പിക്കുന്നുവെന്ന് ഉറപ്പാക്കുന്നു. തൊഴിൽ, വിദ്യാഭ്യാസം, പൊതുഗതാഗതം, ആരോഗ്യ പരിരക്ഷ തുടങ്ങിയ മേഖലകളിലെ സേവനങ്ങൾ ആസൂത്രണം ചെയ്യുന്നതിന് നിങ്ങളുടെ പ്രതികരണങ്ങൾ അത്യന്താപേക്ഷിതമാണ്.
2026-ലെ സെൻസസ് 2026 മേയ് 4-ന് ആരംഭിക്കും. എല്ലാ കനേഡിയൻ കുടുംബങ്ങൾക്കും തപാൽ വഴി സെൻസസ് ക്ഷണക്കത്ത് ലഭിക്കും. അതിൽ ചോദ്യാവലി എങ്ങനെ പൂരിപ്പിക്കണം എന്നതിനെക്കുറിച്ചുള്ള നിർദ്ദേശങ്ങൾ ഉണ്ടായിരിക്കും. ഓൺലൈൻ വഴി ചോദ്യാവലി പൂരിപ്പിക്കുന്നത് തികച്ചും സുരക്ഷിതവും രഹസ്യാത്മകവുമാണ്.
നിങ്ങളുടെ സ്വകാര്യത സംരക്ഷിക്കുന്നതിനും പൂർത്തിയാക്കിയ ചോദ്യാവലികളുടെ സുരക്ഷയും രഹസ്യസ്വഭാവവും നിലനിർത്തുന്നതിനും സ്റ്റാറ്റിസ്റ്റിക്സ് കാനഡ ഏറ്റവും ഉയർന്ന മുൻഗണന നൽകുന്നു. നിങ്ങളുടെ ഉത്തരങ്ങൾ ‘സ്റ്റാറ്റിസ്റ്റിക്സ് ആക്റ്റിന്റെ’ (Statistics Act) അധികാരപരിധിയിലാണ് ശേഖരിക്കുന്നത്. ഇവ തികച്ചും രഹസ്യമായി സൂക്ഷിക്കുന്നതുമാണ്.
നിങ്ങൾക്ക് സംശയങ്ങൾ ഉണ്ടെങ്കിലോ സഹായം ആവശ്യമുണ്ടെങ്കിലോ ദയവായി ഞങ്ങളുടെ ഔദ്യോഗിക വെബ്സൈറ്റ് ആയ census.gc.ca സന്ദർശിക്കുക.
