ഭൂമിയിലെ താപനില വ്യതിയാനം വ്യവസായവൽക്കരണത്തിന് മുമ്പുള്ള അന്തരീക്ഷ താപനിലയേക്കാൾ 1.5 ഡിഗ്രി സെൽഷ്യസിലേക്ക് പരിമിതപ്പെടുത്താൻ ലോകത്തിന് ഇനി ഒരു വഴിയുമില്ലെന്ന കാര്യം ഐക്യരാഷ്ട്രസഭയുടെ പുതിയ റിപ്പോർട്ട് ഔദ്യോഗികമായി ശരിവെച്ചു. ചില വർഷങ്ങളായി വ്യക്തമായിക്കൊണ്ടിരുന്ന ഈ യാഥാർത്ഥ്യമാണ് യു.എൻ എൻവയോൺമെന്റ് പ്രോഗ്രാം (UNEP) തങ്ങളുടെ പുതിയ റിപ്പോർട്ടിലൂടെ സ്ഥിരീകരിച്ചിരിക്കുന്നത്.
1.5 ഡിഗ്രി സെൽഷ്യസ് എന്ന പരിധിക്ക് മുകളിലേക്കുള്ള താപനില ഉയർച്ച പരമാവധി കുറയ്ക്കാനും (overshoot), കുറച്ചു കാലത്തിന് ശേഷം താപവർദ്ധനവ് വീണ്ടും 1.5 ഡിഗ്രി സെൽഷ്യസ് എന്ന സുരക്ഷിത തലത്തിലേക്ക് എത്തിക്കാനും മനുഷ്യർക്ക് ആവശ്യമായ നടപടികൾ സ്വീകരിക്കാൻ സാധിക്കുമോ എന്നതാണ് ഇനി പ്രധാന ചോദ്യമെന്ന് യു.എൻ.ഇ.പി വ്യക്തമാക്കുന്നു. എന്നാൽ ഏറ്റവും അനുകൂലമായ സാഹചര്യങ്ങളിൽ പോലും താപനില കുറയുന്നതിന് മുൻപ് കുറഞ്ഞത് 1.8 ഡിഗ്രി സെൽഷ്യസ് വരെയെങ്കിലും ഉയരുമെന്നാണ് പ്രതീക്ഷിക്കുന്നത്. മറ്റ് ഭൂരിഭാഗം പഠനങ്ങളും പ്രവചിക്കുന്നത് താപനില വ്യവസായവൽക്കരണത്തിന് മുമ്പുള്ളതിനേക്കാൾ 2 ഡിഗ്രി സെൽഷ്യസിനും മുകളിലേക്ക് ഉയർന്ന ശേഷമേ കുറയുകയുള്ളൂ എന്നാണ്.
“താപനില 1.5 ഡിഗ്രി സെൽഷ്യസിന് താഴെ നിർത്തുവാൻ സാധിക്കുന്ന യാതൊരുവിധ ശാസ്ത്രീയ മാർഗ്ഗങ്ങളും ഇനി നമ്മുടെ മുന്നിൽ ബാക്കിയില്ലെന്ന ഘട്ടത്തിലാണ് നാം ഇപ്പോൾ എത്തിനിൽക്കുന്നത്,” എന്ന് റിപ്പോർട്ടിൽ പറയുന്നു. നിലവിൽ വളരെ പരിമിതമായ സ്വാധീനം മാത്രം ചെലുത്താൻ സാധിച്ചിട്ടുള്ള ‘കാർബൺ ഡൈ ഓക്സൈഡ് റിമൂവൽ’ (CDR) സാങ്കേതികവിദ്യകളുടെ വിജയത്തെ ആശ്രയിച്ചായിരിക്കും താപനില വീണ്ടും 1.5 ഡിഗ്രി സെൽഷ്യസിലേക്ക് തിരിച്ചെത്തിക്കാനുള്ള വഴികളെന്നും റിപ്പോർട്ട് ചൂണ്ടിക്കാണിക്കുന്നു.
