കാനഡയിലെ ടൊറന്റോ നഗരഹൃദയത്തെ വിസ്മയിപ്പിക്കാൻ വടക്കേ അമേരിക്കയിലെ ഏറ്റവും വലിയ ഓണാഘോഷമായ ‘മഹാഓണം’ വീണ്ടുമെത്തുന്നു. സംസ്‌കാരവും പാരമ്പര്യവും പ്രവാസി കൂട്ടായ്മയും ഒന്നിക്കുന്ന ഈ സാംസ്‌കാരിക മഹോത്സവം ഓഗസ്റ്റ് 15-ന് ടൊറന്റോയിലെ പ്രശസ്തമായ ‘സങ്കോഫ സ്‌ക്വയറി’ൽ (Sankofa Square) വെച്ചാണ് അരങ്ങേറുന്നത്.

30,000-ത്തിലധികം ആളുകൾ അണിനിരക്കുന്ന ഈ ആഘോഷത്തിൽ പ്രവേശനം തികച്ചും സൗജന്യമാണ്.

ആഘോഷങ്ങളുടെ പ്രധാന ആകർഷണങ്ങളിൽ ഒന്നായി കേരളത്തിന്റെ തനത് സാംസ്‌കാരിക ഭംഗിയും പാരമ്പര്യവും വിളിച്ചോതുന്ന വിവിധങ്ങളായ പരമ്പരാഗത കലാപ്രകടനങ്ങളാണ് അരങ്ങേറുന്നത്. ആയിരത്തിലധികം കലാകാരന്മാരും സാംസ്കാരിക പ്രവർത്തകരും അണിനിരക്കുന്ന വിപുലമായ കലാസന്ധ്യയാണ് സംഘാടകർ ഇതിനായി ഒരുക്കിയിരിക്കുന്നത്.

ഇതിനുപുറമെ, കാണികളെ വിസ്മയിപ്പിക്കാനായി ഒമ്പതടി ഉയരമുള്ള കൂറ്റൻ ആനയുടെ ഐക്കോണിക് ഇൻസ്റ്റലേഷനും വേദിയിൽ പ്രധാന കാഴ്ചയായി ഉയർന്നുനിൽക്കും. നാടൻ രുചിക്കൂട്ടുകൾ ഒത്തുചേരുന്ന വിഭവസമൃദ്ധമായ പരമ്പരാഗത ഓണസദ്യയും പ്രത്യേക തനത് ഭക്ഷ്യമേളയും എത്തുന്നവർക്ക് മലയാളത്തനിമയുടെ പൂർണ്ണമായ രുചികരമായ അനുഭവം സമ്മാനിക്കും.

നാടിന്റെ സാംസ്കാരിക തനിമ തൊട്ടറിയാനും പ്രവാസി മലയാളി കൂട്ടായ്മയുടെ ഭാഗമാകാനും കാനഡയിലുള്ള എല്ലാ ആഘോഷപ്രേമികളെയും സംഘാടകർ ക്ഷണിക്കുന്നു.