ടൊറന്റോ: ലോകത്തെ പിടിച്ചുലയ്ക്കുന്ന യുദ്ധങ്ങളുടെയും രാഷ്ട്രീയ പ്രതിസന്ധികളുടെയും ഫലങ്ങൾ മുൻകൂട്ടി പ്രവചിച്ച് പണം നേടാവുന്ന ‘ഓൺലൈൻ പ്രെഡിക്ഷൻ മാർക്കറ്റുകൾ’ വ്യാപകമാകുന്നു. വെറും പ്രവചനങ്ങൾക്കപ്പുറം, കോടിക്കണക്കിന് രൂപയുടെ വാതുവെപ്പുകൾ ഇത്തരം പ്ലാറ്റ്‌ഫോമുകളിൽ നടക്കുന്നത് കടുത്ത ധാർമ്മികവും നിയമപരവുമായ ചോദ്യങ്ങൾ ഉയർത്തുകയാണ്. പ്രമുഖ പ്ലാറ്റ്‌ഫോമായ ‘പോളിമാർക്കറ്റ്’ ഉൾപ്പെടെയുള്ളവയിലൂടെ നടക്കുന്ന ഈ ഇടപാടുകളിൽ ഇൻസൈഡർ ട്രേഡിംഗ് നടക്കുന്നുണ്ടെന്ന ആരോപണവും ശക്തമാണ്.
അമേരിക്കയും ഇറാനും തമ്മിലുള്ള വെടിനിർത്തൽ പ്രഖ്യാപനത്തിന് മണിക്കൂറുകൾക്ക് മുൻപ് ചില അക്കൗണ്ടുകൾ നടത്തിയ വൻതുകയുടെ വാതുവെപ്പുകളാണ് ഇപ്പോൾ വിവാദമായിരിക്കുന്നത്. ഏപ്രിൽ 7-ലെ ഔദ്യോഗിക പ്രഖ്യാപനത്തിന് തൊട്ടുമുൻപ് ഒരു അജ്ഞാത അക്കൗണ്ട് നടത്തിയ ബെറ്റിംഗിലൂടെ ഏകദേശം 2,00,000 യുഎസ് ഡോളർ ലാഭമുണ്ടാക്കിയതായി കണ്ടെത്തി. ഭരണകൂടത്തിനുള്ളിലെ രഹസ്യവിവരങ്ങൾ ചോർത്തിയാണ് ഇത്തരം ലാഭമുണ്ടാക്കുന്നതെന്ന സംശയം ഇതോടെ ബലപ്പെട്ടു. വെനിസ്വേല മുൻ പ്രസിഡന്റ് നിക്കോളാസ് മഡുറോയുടെ അറസ്റ്റിന് മുൻപും സമാനമായ രീതിയിൽ വലിയ തുകയുടെ വാതുവെപ്പുകൾ നടന്നിരുന്നു.
മനുഷ്യജീവനെ ബാധിക്കുന്ന യുദ്ധങ്ങളിലും മിസൈൽ ആക്രമണങ്ങളിലും പണം വാതുവെക്കുന്നത് അതീവ ഗൗരവകരമായ പ്രശ്നമാണെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. ഇറാനിൽ വെടിവെച്ചിട്ട എഫ്-15 വിമാനത്തിലെ സൈനികരുടെ ഭാവി സംബന്ധിച്ചും പ്ലാറ്റ്‌ഫോമുകളിൽ ബെറ്റിംഗ് നടന്നത് വലിയ പ്രതിഷേധത്തിന് ഇടയാക്കി. ഇത്തരം പ്രവണതകൾ സൈനിക രഹസ്യങ്ങൾ ചോരുന്നതിനും നയതന്ത്ര പ്രതിസന്ധികൾക്കും കാരണമാകുമെന്ന് വിദഗ്ധർ ചൂണ്ടിക്കാട്ടുന്നു. യുവാക്കളെ ചൂതാട്ടത്തിലേക്ക് നയിക്കുന്ന ഈ ആപ്പുകൾ കാനഡയിലെ ഒന്റാറിയോ ഉൾപ്പെടെയുള്ള പ്രവിശ്യകളിൽ നിലവിൽ നിരോധിച്ചിരിക്കുകയാണ്. എങ്കിലും വിപിഎൻ, ക്രിപ്‌റ്റോ കറൻസി എന്നിവ ഉപയോഗിച്ച് പലരും ഇപ്പോഴും ഇത്തരം സൈറ്റുകൾ ഉപയോഗിക്കുന്നുണ്ട്.
