റഷ്യ-യുക്രെയ്ൻ യുദ്ധത്തെത്തുടർന്ന് കാനഡയിൽ അഭയം പ്രാപിച്ച യുക്രേനിയൻ പൗരന്മാർക്ക് ആശ്വാസമേകി കാനഡ സർക്കാർ. കാനഡ-യുക്രെയ്ൻ ഓതറൈസേഷൻ ഫോർ എമർജൻസി ട്രാവൽ (CUAET) പദ്ധതി വഴി രാജ്യത്തെത്തിയവരുടെ വർക്ക് പെർമിറ്റ് കാലാവധി 2027 മാർച്ച് 31 വരെ നീട്ടിയതായി ഫെഡറൽ സർക്കാർ അറിയിച്ചു. ഇളവുകൾ 2026 മാർച്ച് 31-ന് അവസാനിച്ചതോടെയാണ് ഈ പുതിയ നീക്കം.
പുതിയ ഉത്തരവ് പ്രകാരം അർഹരായ യുക്രേനിയൻ പൗരന്മാർക്കും അവരുടെ കുടുംബാംഗങ്ങൾക്കും മൂന്ന് വർഷം വരെ കാലാവധിയുള്ള വർക്ക് പെർമിറ്റ് നീട്ടി ലഭിക്കും. എന്നാൽ ഈ പ്രത്യേക ആനുകൂല്യം ഒരാൾക്ക് ഒരു തവണ മാത്രമേ ഉപയോഗിക്കാൻ സാധിക്കൂ. അപേക്ഷ സമർപ്പിക്കുമ്പോഴും അത് അനുവദിക്കുമ്പോഴും അപേക്ഷകൻ കാനഡയിൽ സാധുവായ താത്കാലിക താമസ പദവിയിൽ തുടരുന്നുണ്ടാകണം. പ്രധാനമായും രണ്ട് വിഭാഗത്തിലുള്ളവർക്കാണ് ഈ ആനുകൂല്യം ലഭിക്കുക. 2024 മാർച്ച് 31-നോ അതിനു മുൻപോ കാനഡയിൽ എത്തിയവരാണ് ആദ്യ വിഭാഗത്തിൽ ഉൾപ്പെടുന്നത്. 2024 ഏപ്രിൽ 1-നും ഡിസംബർ 31-നും ഇടയിൽ കാനഡയിൽ എത്തിയവർ രണ്ടാമത്തെ വിഭാഗത്തിലും ഉൾപ്പെടും. യുദ്ധബാധിതരെ സഹായിക്കുന്നതിന്റെ ഭാഗമായി നടപ്പിലാക്കിയ CUAET പദ്ധതിയിലൂടെ ഇതുവരെ ഏകദേശം മൂന്ന് ലക്ഷത്തോളം യുക്രേനിയൻ പൗരന്മാരാണ് കാനഡയിൽ എത്തിയത്. മാനുഷിക പരിഗണന മുൻനിർത്തി ഇറാൻ, സുഡാൻ, ഗാസ, ഹെയ്തി തുടങ്ങിയ രാജ്യങ്ങളിലെ ജനങ്ങൾക്കും കാനഡ നേരത്തെ സമാനമായ ഇളവുകൾ നൽകിയിരുന്നു. പുതിയ പോളിസി പ്രകാരം വർക്ക് പെർമിറ്റ് പുതുക്കാൻ ആഗ്രഹിക്കുന്നവർ ഐ.ആർ.സി.സി (IRCC) വെബ്സൈറ്റിലെ നിർദ്ദേശങ്ങൾ പാലിക്കണമെന്ന് അധികൃതർ അറിയിച്ചു.
