യുഎസിലെ ടെക്സസില് അപ്പാച്ചെ ഹെലികോപ്റ്റര് തകര്ന്നുവീണ് രണ്ട് സൈനികര് മരിച്ചു. യു.എസ്. ആര്മിയുടെ 64 അപ്പാച്ചെ ഹെലികോപ്റ്ററാണ് സലാഡോയില് അപകടത്തില്പ്പെട്ടത്. ബെല് കൗണ്ടി ഷെരീഫ് ഓഫിസും യു.എസ്. ആര്മിയും അപകടം സ്ഥിരീകരിച്ചു. വയലിലേക്കാണ് ഹെലികോപ്റ്റര് പതിച്ചത്. ഹെലികോപ്റ്ററില് രണ്ട് സൈനികരാണ് ഉണ്ടായിരുന്നതെന്നും ഇരുവരും സംഭവസ്ഥലത്തുവെച്ച് മരിച്ചതായി സ്ഥിരീകരിച്ചതായും ബെല് കൗണ്ടി ഷെരീഫ് ഓഫിസ് വക്താവ് അറിയിച്ചു.
ഹെലികോപ്റ്റര് തകര്ന്നതിനെ തുടര്ന്ന് പ്രദേശത്ത് തീപിടിത്തവും ഉണ്ടായി. തീ അണയ്ക്കുന്നതിനായി ടാങ്കര് വിമാനത്തില്നിന്ന് അഗ്നിശമന വസ്തുക്കള് വിതറിയതായും അധികൃതര് വ്യക്തമാക്കി. അപകട കാരണം സംബന്ധിച്ച അന്വേഷണം പുരോഗമിക്കുകയാണ്. അപകട കാരണത്തെക്കുറിച്ചോ മരിച്ച സൈനികരെക്കുറിച്ചോ ഉള്ള വിവരങ്ങള് പുറത്തുവിട്ടിട്ടില്ല.
