കാനഡയിൽ താമസിക്കുന്ന സഞ്ചാരികൾക്ക് യൂറോപ്യൻ യൂണിയൻ രാജ്യങ്ങളിലേക്കുള്ള (ഷെങ്കൻ ഏരിയ) യാത്ര കൂടുതൽ കടുപ്പമുള്ളതാകുന്നു. യൂറോപ്യൻ യൂണിയൻ നടപ്പാക്കുന്ന എൻട്രി/എക്സിറ്റ് സിസ്റ്റം (EES), ഇലക്ട്രോണിക് ട്രാവൽ ഇൻഫർമേഷൻ ആൻഡ് ഓതറൈസേഷൻ സിസ്റ്റം (ETIAS) എന്നീ പുതിയ സംവിധാനങ്ങളാണ് ഇതിന് കാരണം. 2025 ഒക്ടോബറിൽ EES പൂർണ്ണമായി നിലവിൽ വരുമ്പോൾ, പാസ്പോർട്ടിൽ കൈ കൊണ്ട് സീൽ ചെയ്യുന്ന രീതിക്ക് പകരം ബയോമെട്രിക് ഡാറ്റ (വിരലടയാളവും മുഖചിത്രവും) ഉപയോഗിച്ച് യാത്രക്കാരുടെ വിവരങ്ങൾ ഇലക്ട്രോണിക് സംവിധാനത്തിൽ രേഖപ്പെടുത്തും. ഇത് അതിർത്തി കടന്നുള്ള സഞ്ചാരം കൂടുതൽ കാര്യക്ഷമമാക്കാനും, നിശ്ചിത സമയപരിധിയേക്കാൾ കൂടുതൽ ആളുകൾ രാജ്യത്ത് തങ്ങുന്നത് തടയാനും ലക്ഷ്യമിടുന്നു.
കൂടാതെ, അടുത്ത വർഷം അവസാനത്തോടെ നടപ്പിലാക്കാൻ സാധ്യതയുള്ള ETIAS സംവിധാനവും കനേഡിയൻ പൗരന്മാർ ഉൾപ്പെടെയുള്ളവരുടെ യൂറോപ്പ് യാത്ര ദുഷ്കരമാക്കും. ഇപ്പോൾ വിസ ആവശ്യമില്ലാത്ത ഇത്തരം യാത്രക്കാർക്ക് യൂറോപ്പിലേക്ക് പ്രവേശിക്കുന്നതിന് മുൻകൂർ അനുമതി നിർബന്ധമാക്കും. കാനഡയിൽ നിലവിലുള്ള ഇലക്ട്രോണിക് ട്രാവൽ ഓതറൈസേഷന് (eTA) സമാനമായ ഈ സംവിധാനം ഓൺലൈൻ പോർട്ടൽ വഴി 20 യൂറോ നൽകി വാങ്ങേണ്ടിവരും. യാത്രാനുമതി നൽകുന്നതിന് മുമ്പ് യൂറോപ്യൻ അതിർത്തി ഉദ്യോഗസ്ഥർക്ക് യാത്രക്കാരെക്കുറിച്ച് മുൻകൂട്ടി വിവരങ്ങൾ ലഭിക്കാൻ ഇത് സഹായിക്കും. സുരക്ഷ വർദ്ധിപ്പിക്കുന്നതിനും, ഭീകരവാദവും സംഘടിത കുറ്റകൃത്യങ്ങളും തടയുന്നതിനുമുള്ള യൂറോപ്യൻ യൂണിയൻ ശ്രമങ്ങളുടെ ഭാഗമായാണ് ഈ പുതിയ നിയമങ്ങൾ.
