വാരാന്ത്യം മുതൽ നഗരത്തിലെ പബ്ലിക് ലൈബ്രറിയുടെ 100 ബ്രാഞ്ചുകളും ഞായറാഴ്ച തുറന്ന് പ്രവർത്തിക്കുമെന്ന് ടൊറൻ്റോ മേയർ ഒലിവിയ ചൗ അറിയിച്ചു. എല്ലാ ബ്രാഞ്ചുകളും ഞായറാഴ്ച ഉച്ചയ്ക്ക് 12 മുതൽ വൈകുന്നേരം 5 വരെയായിരിക്കും തുറക്കുക.
2026 ജൂലൈ മാസത്തോടെ എല്ലാ ബ്രാഞ്ചുകളും വർഷം മുഴുവനും തുറന്നിരിക്കുക എന്ന ലക്ഷ്യത്തോടെ, ലൈബ്രറി സേവനം വിപുലീകരിക്കാനുള്ള തന്റെ പദ്ധതി 2024 ഒക്ടോബറിൽ മേയർ വെളിപ്പെടുത്തിയിരുന്നു. ആ സമയത്ത്, പ്രവർത്തന സമയം വർധിപ്പിക്കുന്നതിന് 80 ലക്ഷം ഡോളർ അധിക ചിലവ് വരുമെന്ന് പ്രതീക്ഷിച്ചിരുന്നു. കഴിഞ്ഞ വർഷം നഗരത്തിൽ ലൈബ്രറിഉപയോഗിക്കുന്നവരുടെ എണ്ണത്തിൽ 44 ശതമാനം വർധന രേഖപ്പെടുത്തിയതായും ടൊറൻ്റോയിലെ ഓരോ 10 പേരിൽ 8 പേരും ലൈബ്രറി ഉപയോഗിക്കുന്നതായും ഒലിവിയ ചൗ പറഞ്ഞു.
