കുട്ടികൾക്ക് നൽകുന്ന ഭക്ഷണപദാർത്ഥങ്ങളുടെയും ബേബി ഫുഡുകളുടെയും പരസ്യങ്ങളിൽ തെറ്റിദ്ധാരണാജനകമായ വിവരങ്ങൾ ഉൾപ്പെടുത്തുന്നവർക്കെതിരെ കർശന നടപടിയുണ്ടാകുമെന്ന് മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ മുന്നറിയിപ്പ് നൽകി. ആശുപത്രികൾ, സമ്മേളനങ്ങൾ, സെമിനാറുകൾ എന്നിവയിലൂടെയുള്ള കുഞ്ഞുങ്ങളുടെ ഭക്ഷണവുമായി ബന്ധപ്പെട്ട പ്രചാരണങ്ങളും പരസ്യങ്ങളും അധികൃതർ കർശനമായി നിരീക്ഷിക്കും.
സമൂഹമാധ്യമങ്ങൾ, ഇ-കൊമേഴ്‌സ് പ്ലാറ്റ്‌ഫോമുകൾ, വിവിധ മെസേജിങ് ആപ്പുകൾ എന്നിവ വഴിയുള്ള പരസ്യങ്ങൾക്കും ഈ നിയന്ത്രണങ്ങൾ ബാധകമാണ്. ഇൻഫന്റ് മിൽക് സബ്സ്റ്റിറ്റ്യൂട്ട്സ് ആക്ട് 1992, ഇൻഫന്റ് ന്യൂട്രീഷൻ റെഗുലേഷൻ 2020 എന്നീ നിയമങ്ങളുടെ അടിസ്ഥാനത്തിൽ ഉൽപന്നങ്ങളുടെ സൗജന്യ സാമ്പിളുകൾ, സമ്മാനങ്ങൾ, കൂപ്പണുകൾ, ക്യാഷ്ബാക്ക് ഓഫറുകൾ തുടങ്ങിയ പ്രമോഷൻ രീതികൾ കർശനമായി നിരോധിച്ചിരിക്കുന്നു.
ചികിത്സാ ആവശ്യങ്ങൾക്കായി കുഞ്ഞുങ്ങൾക്ക് ഇൻഫന്റ് ഫോർമുല നൽകാവുന്നതാണെങ്കിലും, ഡോക്ടർമാരോ ആശുപത്രികളോ പ്രത്യേക ബ്രാൻഡുകൾ നിർദ്ദേശിക്കുകയോ പ്രോത്സാഹിപ്പിക്കുകയോ ചെയ്യരുത്. ഇത്തരം ഉൽപന്നങ്ങൾ ഉപയോഗിക്കുന്നതു വഴി കുട്ടികൾക്ക് ആരോഗ്യപ്രശ്നങ്ങൾ ഉണ്ടായാൽ അത് ഉടൻ റിപ്പോർട്ട് ചെയ്യണമെന്ന് ആശുപത്രികൾക്ക് നിർദ്ദേശം നൽകിയിട്ടുണ്ട്. കൂടാതെ, ഉൽപന്നങ്ങൾ പ്രമോട്ട് ചെയ്യുന്നതിനായി ബേബി ഫുഡ് നിർമ്മാതാക്കൾ ഡോക്ടർമാർക്കോ ആശുപത്രികൾക്കോ മെഡിക്കൽ അസോസിയേഷനുകൾക്കോ സ്പോൺസർഷിപ്പുകൾ നൽകരുതെന്നും എഫ്ഡിഎ വ്യക്തമാക്കിയിട്ടുണ്ട്. ഇതിന്റെ ഭാഗമായി വരുന്ന ദിവസങ്ങളിൽ വ്യാപകമായ പരിശോധനകൾ നടത്തുമെന്നും അധികൃതർ അറിയിച്ചു.
