ദുബായ് : ലോകത്തിലെ ഏറ്റവും ഉയരം കൂടിയ റിസോർട്ട് എന്ന റെക്കോർഡും ദുബായ്ക്ക് സ്വന്തം. ‘തെർമ് ദുബായ്’ എന്ന് പേരിട്ടിരിക്കുന്ന റിസോർട്ട് 2028-ൽ നിർമ്മാണം പൂർത്തിയാകും. 200 കോടി ദിർഹത്തിന്റെ (ഏകദേശം 4742 കോടി രൂപ) പദ്ധതിക്ക് ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധമന്ത്രിയും ദുബായ് എക്സിക്യുട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അംഗീകാരം നൽകി.
പ്രതിവർഷം 17 ലക്ഷം സന്ദർശകരെ സ്വാഗതം ചെയ്യുക എന്ന ലക്ഷ്യത്തോടെ നിർമ്മിക്കുന്ന ‘തെർമ് ദുബായ്’ റിസോർട്ട് സബീൽ പാർക്കിൽ 100 മീറ്റർ ഉയരത്തിലും അഞ്ചുലക്ഷം ചതുരശ്രമീറ്റർ വിസ്തീർണത്തിലുമാണ് പടുത്തുയർത്തുന്നത്. സ്വകാര്യ മേഖലയുടെ സഹകരണത്തോടെയാണ് പദ്ധതി നടപ്പിലാക്കുന്നത്. പ്രകൃതിചികിത്സാമേഖലകൾ, തെർമൽ പൂളുകൾ, വിശ്രമത്തിനായി പ്രത്യേക നിലകൾ എന്നിങ്ങനെ ലോകോത്തര സൗകര്യങ്ങളുമുണ്ടാകും. സ്റ്റാർ റസ്റ്ററന്റ്, 18 മീറ്റർ ഉയരമുള്ള മൂന്ന് വെള്ളച്ചാട്ടങ്ങൾ, 4500 ചതുരശ്രയടി വിസ്തീർണത്തിൽ ഇൻഡോർ, ടെറസ് പൂളുകൾ, 15 വാട്ടർ സ്ലൈഡുകൾ, ആർട്ട് ഇൻസ്റ്റലേഷനുകൾ തുടങ്ങിയവയാണ് മറ്റ്‌ ആകർഷണങ്ങൾ.
