ന്യൂയോർക്ക്: നെവാഡയിലെ മൂന്നാമത്തെ ഏറ്റവും വലിയ നഗരമായ റെനോയുടെ അതിർത്തിയിലേക്ക് ല കാട്ടുതീ പടർന്നതിനെത്തുടർന്ന് പതിനായിരക്കണക്കിന് ആളുകളെ ഒഴിപ്പിച്ചു. ഞായറാഴ്ചയും നിരവധി ആളുകളോട് പ്രദേശത്തുനിന്ന് മാറിത്താമസിക്കാൻ അധികൃതർ നിർദേശിച്ചു.

വടക്കൻ റെനോയിൽ ഭീഷണി സൃഷ്ടിക്കുന്ന ‘ഹോക്ക് ഫയർ’ (Hawk Fire) കാരണം ഏകദേശം 42,000 നിവാസികളെ മാറ്റിപ്പാർപ്പിക്കുകയോ ഒഴിപ്പിക്കൽ നടപടികൾക്ക് വിധേയരാക്കുകയോ ചെയ്തിട്ടുണ്ട്. കൂടാതെ 45,000 പേരോട് മാറിത്താമസിക്കാൻ തയ്യാറായിരിക്കാനും അധികൃതർ ഞായറാഴ്ച രാവിലെ അറിയിച്ചു.

റോഡുകൾക്ക് സമീപത്തേക്ക് തീജ്വാലകൾ എത്തുന്നതിന്റെ ദൃശ്യങ്ങൾ പ്രാദേശിക ടിവി ചാനലുകൾ പുറത്തുവിട്ടു. കുന്നുകളിൽ നിന്നുള്ള പുക സമീപത്തെ പാർപ്പിട മേഖലകളിലേക്ക് പടരുന്നതായി റോയിട്ടേഴ്‌സ് സ്ഥിരീകരിച്ച വീഡിയോകളിൽ കാണാം.

തീപിടിത്ത വിവരങ്ങൾ ട്രാക്ക് ചെയ്യുന്ന വെബ്‌സൈറ്റുകൾ അനുസരിച്ച്, സിസെറ നെവാഡ കുന്നുകൾ മുതൽ വടക്കുപടിഞ്ഞാറൻ റെനോയിലെ യൂണിവേഴ്‌സിറ്റി ഓഫ് നെവാഡ വരെയുള്ള പ്രദേശങ്ങൾ ഒഴിപ്പിക്കൽ മേഖലയിൽ ഉൾപ്പെടുന്നു.

ഞായറാഴ്ച നടത്തിയ വാർത്താ സമ്മേളനത്തിൽ, തീപിടിത്തത്തിൽ ഇതുവരെ 13,000 ഏക്കർ (5,261 ഹെക്ടർ) ഭൂമി കത്തിനശിച്ചതായി അധികൃതർ അറിയിച്ചു. മനുഷ്യരുടെ ഇടപെടൽ മൂലമാണ് തീപിടിത്തമുണ്ടായതെന്നും ഇതിൽ അന്വേഷണം നടക്കുകയാണെന്നും അവർ പറഞ്ഞു.

മൂന്ന് സാധാരണക്കാർക്കും മൂന്ന് രക്ഷാപ്രവർത്തകർക്കും പരിക്കേറ്റതായി ഫയർ ആൻഡ് റെസ്ക്യൂ ഓപ്പറേഷൻസ് കമാൻഡർ ഷെയ്ൻ ആക്കർസൺ പറഞ്ഞു.

ശനിയാഴ്ച പ്രാദേശിക സമയം രാവിലെ 11:15 ഓടെയാണ് (1815 GMT) ഹോക്ക് മെഡോ ട്രെയിലിന് സമീപം തീപിടിത്തമുണ്ടായതായി ആദ്യ വിവരം ലഭിച്ചതെന്ന് ട്രക്കി മെഡോസ് ഫയർ പ്രൊട്ടക്ഷൻ ഡിസ്ട്രിക്റ്റ് ചീഫ് റിച്ചാർഡ് എഡ്വേർഡ്സ് പറഞ്ഞു. “തീവ്രമായ റെഡ് ഫ്ലാഗ് സാഹചര്യങ്ങളിലാണ്” ശനിയാഴ്ച അഗ്നിശമന സേനാംഗങ്ങൾ പ്രവർത്തിച്ചതെന്നും അദ്ദേഹം കൂട്ടിച്ചേർത്തു.

ഉയർന്ന താപനില, കുറഞ്ഞ ഈർപ്പം, ശക്തമായ കാറ്റ് എന്നിവ ഒത്തുചേരുന്നതാണ് കാട്ടുതീയുടെ സാധ്യത വർദ്ധിപ്പിക്കുന്ന റെഡ് ഫ്ലാഗ് സാഹചര്യം. ഞായറാഴ്ച ഉച്ചകഴിഞ്ഞും സമാനമായ സാഹചര്യങ്ങൾ തുടരുമെന്ന് പ്രതീക്ഷിക്കുന്നതായി എഡ്വേർഡ്സ് പറഞ്ഞു.

റെനോയും ലേക്ക് താഹോയുടെ ചില ഭാഗങ്ങളും ഉൾപ്പെടുന്ന വാഷോ കൗണ്ടിയിൽ നെവാഡ ഗവർണർ ജോ ലൊംബാർഡോ ശനിയാഴ്ച വൈകിട്ട് അടിയന്തരാവസ്ഥ പ്രഖ്യാപിച്ചു.

“ഇത് വേഗത്തിൽ മാറിക്കൊണ്ടിരിക്കുന്ന ഒരു സാഹചര്യമാണ്. ബാധിത പ്രദേശങ്ങളിലുള്ള എല്ലാവരും ജാഗ്രത പാലിക്കണമെന്നും പ്രാദേശിക ഭരണകൂടത്തിന്റെ നിർദേശങ്ങൾ പാലിക്കണമെന്നും ഞാൻ അഭ്യർത്ഥിക്കുന്നു,” ലൊംബാർഡോ പ്രസ്താവനയിൽ പറഞ്ഞു.

തീ അണയ്ക്കാൻ സഹായിക്കുന്നതിനായി രണ്ട് നാഷണൽ ഗാർഡ് ഹെലികോപ്റ്ററുകളും, വാഷോ കൗണ്ടി ഷെരീഫ് ഓഫീസിനെ പിന്തുണയ്ക്കാൻ 60 നാഷണൽ ഗാർഡ് ഉദ്യോഗസ്ഥരെയും വിന്യസിക്കാൻ ലൊംബാർഡോ അനുമതി നൽകി.

അതേസമയം, റെനോ-താഹോ ഇന്റർനാഷണൽ എയർപോർട്ട് ഒഴിപ്പിക്കൽ മേഖലയ്ക്ക് പുറത്താണ്. ഞായറാഴ്ച ഇവിടെനിന്നുള്ള വാണിജ്യ വിമാന സർവീസുകൾ സാധാരണ നിലയിൽ പ്രവർത്തിച്ചു.