ഹാലിഫാക്‌സ് : രാജ്യത്ത് ഈ വര്‍ഷവും കൊടുങ്കാറ്റുകള്‍ സജീവമാകാന്‍ സാധ്യതയുണ്ടെന്ന് കാനഡയിലെ മുതിര്‍ന്ന കാലാവസ്ഥാ നിരീക്ഷകന്‍ ബോബ് റോബിച്ചോഡ്. എന്നാല്‍, അതുമൂലമുണ്ടാകാനിടയുള്ള ആഘാതം ഇപ്പോള്‍ പ്രവചിക്കാന്‍ കഴിയില്ലെന്നും ഹാലിഫാക്‌സിലെ കനേഡിയന്‍ ഹറിക്കെയ്ന്‍ സെന്റര്‍ വ്യക്തമാക്കി.

സാധാരണയായി എല്ലാ ഉഷ്ണമേഖലാ കൊടുങ്കാറ്റുകളുടെയും 35 മുതല്‍ 40 ശതമാനം വരെ കനേഡിയന്‍ പ്രവചന മേഖലയിലേക്ക് പ്രവേശിക്കാറുണ്ടെന്ന് സെന്റര്‍ കണക്കാക്കുന്നു. ഓരോ വര്‍ഷവും ശരാശരി രണ്ടോ നാലോ പേരുള്ള കൊടുങ്കാറ്റുകള്‍ കനേഡിയന്‍ മേഖലയില്‍ പ്രവേശിക്കാറുണ്ട്. അതിനാല്‍ അപകടകരമായ കാലാവസ്ഥയെ നേരിടാന്‍ തയ്യാറെടുപ്പുകള്‍ അനിവാര്യമാണെന്നും റോബിച്ചോഡ് പറഞ്ഞു.

കഴിഞ്ഞ വര്‍ഷം 18 പേരുകളില്‍ കൊടുങ്കാറ്റുകള്‍ രൂപപ്പെട്ടെങ്കിലും, ‘ഏര്‍ണസ്റ്റോ’ എന്ന ഒറ്റ കൊടുങ്കാറ്റ് മാത്രമാണ് കനേഡിയന്‍ മേഖലയില്‍ എത്തിയത്. എന്നാല്‍, 2022-ല്‍ കനേഡിയന്‍ മേഖലയില്‍ കൊടുങ്കാറ്റുകള്‍ കുറവായിരുന്നിട്ടും, സെപ്റ്റംബറില്‍ എത്തിയ ഫിയോണ ചുഴലിക്കാറ്റ് അറ്റ്‌ലാന്റിക് കാനഡയില്‍ ഏറ്റവും വലിയ നാശനഷ്ടങ്ങള്‍ക്ക് കാരണമായി. ഫിയോണ 80 കോടി ഡോളറിലധികം ഇന്‍ഷുറന്‍സ് നാശനഷ്ടങ്ങള്‍ക്ക് കാരണമാവുകയും മൂന്ന് പേരുടെ ജീവനെടുക്കുകയും ചെയ്തിരുന്നു.