സാങ്കേതിക തകരാർ മൂലംകാനഡയിൽ എൺപതിനായിരത്തിലധികം വാഹനങ്ങൾ ഹ്യുണ്ടായ് കമ്പനി തിരിച്ചുവിളിക്കുന്നു. വാഹനങ്ങളിലെ ഫ്രണ്ട് ക്യാമറയിലുള്ള സോഫ്റ്റ്‌വെയർ തകരാർ കാരണം ‘ഫോർവേഡ് കൊളീഷൻ അവോയ്ഡൻസ്’ (FCA) സംവിധാനം പെട്ടെന്ന് ബ്രേക്ക് പ്രയോഗിക്കാൻ കാരണമാകുമെന്ന് ട്രാൻസ്പോർട്ട് കാനഡ പറയുന്നു. വാഹനം ഇത്തരത്തിൽ പെട്ടെന്ന് ബ്രേക്ക് ചെയ്യുന്നത് അപകടങ്ങൾക്ക് കാരണമാകുമെന്ന് ഫെഡറൽ ഏജൻസി അറിയിച്ചു.
2025-ൽ നിർമ്മിച്ച ഹ്യുണ്ടായ് സാന്താ ക്രൂസ് (Hyundai Santa Cruz) മോഡലുകളും, 2025, 2026 വർഷങ്ങളിൽ നിർമ്മിച്ച ഹ്യുണ്ടായ് ട്യൂസൺ (Hyundai Tucson) മോഡലുകളുമാണ് തിരിച്ചുവിളിക്കുന്നത്. ഹ്യുണ്ടായ് ട്യൂസണിന്റെ 2026 മോഡലുകളിലെ ഗ്യാസ്, ഹൈബ്രിഡ് (HEV), പ്ലഗ്-ഇൻ ഹൈബ്രിഡ് (PHEV) പതിപ്പുകളെല്ലാം തിരിച്ചുവിളിച്ചിട്ടുണ്ട്. തകരാർ ബാധിച്ച വാഹനങ്ങളുടെ ഉടമകളെ കമ്പനി വിവരമറിയിക്കുമെന്നും, ഫ്രണ്ട് ക്യാമറ സോഫ്റ്റ്‌വെയർ അപ്‌ഡേറ്റ് ചെയ്യുന്നതിനായി വാഹനങ്ങൾ ഡീലർഷിപ്പുകളിൽ എത്തിക്കാൻ നിർദ്ദേശിക്കുമെന്നും ഹ്യുണ്ടായ് വ്യക്തമാക്കി.
