യുഎസില്‍ സ്‌കൈ ഡൈവിംഗ് വിമാനം തകര്‍ന്ന് 11 യാത്രക്കാരും പൈലറ്റും കൊല്ലപ്പെട്ടു. ഞായറാഴ്ച പ്രാദേശിക സമയം രാവിലെ 11.30ഓടെ മിസോറിയിലെ ബട്ട്‌ലര്‍ മെമ്മോറിയല്‍ എയര്‍പോര്‍ട്ടിന് സമീപമാണ് അപകടം. സാങ്കേതിക തകരാറിനെ തുടർന്നാണ് അപകടമെന്ന് പ്രാഥമിക റിപ്പോർട്ടുകൾ സൂചിപ്പിക്കുന്നു. വിമാനം പറന്നുയര്‍ന്നതിന് പിന്നാലെ തകരാർ കണ്ടെത്തി തിരിച്ചിറക്കാന്‍ ശ്രമിക്കുന്നതിനിടെയാണ് അപകടമുണ്ടായത്. അപകടസമയത്ത് വിമാനത്തില്‍ ആകെ 12 പേരുണ്ടായിരുന്നുവെന്ന് അധികൃതര്‍ സ്ഥിരീകരിച്ചു. കാന്‍സാസ് നഗരത്തില്‍ നിന്നും ഏകദേശം 66 മൈല്‍ അകലെയാണ് ബട്‌ലര്‍ നഗരം സ്ഥിതി ചെയ്യുന്നത്.

ബട്ലര്‍ മെമ്മോറിയല്‍ വിമാനത്താവളത്തില്‍ നിന്ന് സര്‍വീസ് നടത്തിയിരുന്ന സ്‌കൈഡൈവിംഗ് വിമാനമായിരുന്നു അപകടത്തില്‍പ്പെട്ടത്. യാത്രക്കാരില്‍ ചിലര്‍ സ്‌കൈഡൈവിംഗിനായി തയ്യാറെടുക്കുകയായിരുന്നു. വിമാനത്താവളത്തിന്റെ ഭാഗമായ ഒരു വയലിലാണ് വിമാനം തകര്‍ന്നുവീണത്. നാഷണൽ ട്രാന്‍സ്‌പോര്‍ട്ട് സേഫ്റ്റി ബോര്‍ഡും ഫെഡറല്‍ ഏവിയേഷന്‍ അഡ്മിനിസ്ട്രേഷനും അന്വേഷണം ആരംഭിച്ചു. പസഫിക് എയറോ സ്‌പേസ് പി-750 വിമാനമാണ് അപകടത്തില്‍പ്പെട്ടത്.