സാൽമൊണെല്ല അണുബാധയെ തുടർന്ന് രാജ്യവ്യാപകമായി വീണ്ടും പിസ്ത ഉൽപ്പന്നങ്ങൾ തിരിച്ചുവിളിച്ച് കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) . ഡിസംബർ 17 വരെ, വിവിധ ബ്രാൻഡുകളുടെ 277 ഉൽപ്പന്നങ്ങളാണ് CFIA തിരിച്ചുവിളിച്ചത്. അസംസ്കൃതവും വറുത്തതുമായ പിസ്ത, ചോക്ലേറ്റ് ബാറുകൾ, ബക്ലാവ പോലുള്ള പേസ്ട്രികൾ, പിസ്ത കൊണ്ടുള്ള മറ്റ് പലഹാരങ്ങൾ എന്നിവ തിരിച്ചുവിളിച്ച ഉൽപ്പന്നങ്ങളിൽ ഉൾപ്പെടുന്നു. ജൂലൈ മുതൽ പിസ്തയുമായി ബന്ധപ്പെട്ട് തിരിച്ചുവിളിക്കൽ മുന്നറിയിപ്പുകൾ നൽകിയിരുന്നു. അന്വേഷണം പുരോഗമിക്കുന്നതിനനുസരിച്ച് കൂടുതൽ ഉൽപ്പന്നങ്ങൾ ഉൾപ്പെടുത്തി മുന്നറിയിപ്പുകൾ പുതുക്കുന്നുണ്ട്. സെപ്റ്റംബർ അവസാനം മുതൽ, ഇറാനിൽ നിന്നുള്ള പിസ്തയും പിസ്ത അടങ്ങിയ ഉൽപ്പന്നങ്ങളും ഇറക്കുമതി ചെയ്യുന്നത് കാനഡ നിരോധിച്ചിട്ടുണ്ട്.
തിരിച്ചുവിളിച്ച പിസ്ത ഉൽപ്പന്നങ്ങൾ ഉപഭോക്താക്കൾ കഴിക്കുകയോ വിതരണം ചെയ്യുകയോ ചെയ്യരുത് എന്ന് പൊതുജനാരോഗ്യ ഉദ്യോഗസ്ഥർ നിർദ്ദേശിച്ചു. ഈ ഉൽപ്പന്നങ്ങൾ നശിപ്പിക്കുകയോ വാങ്ങിയ കടയിൽ തിരികെ നൽകുകയോ ചെയ്യണമെന്ന് ഉദ്യോഗസ്ഥർ അറിയിച്ചു. കുട്ടികൾ, ഗർഭിണികൾ, പ്രായമായവർ, രോഗപ്രതിരോധ ശേഷി കുറഞ്ഞവർ എന്നിവർക്ക് സാൽമൊണല്ല ഗുരുതരമായേക്കാമെന്നാണ് മുന്നറിയിപ്പ്. പനി, തലവേദന, ഛർദ്ദി, വയറുവേദന തുടങ്ങിയവയാണ് പ്രധാന ലക്ഷണങ്ങൾ.
