കറുകച്ചാൽ: അരി, പഞ്ചസാര, കാപ്പിപ്പൊടി പിന്നെ ഹാൻസും… പലചരക്കു കടയിലെ ലഹരി കച്ചവടം പൊളിച്ച് പോലീസ്. പലചരക്കു കടയിൽ ഹാൻസ് കച്ചവടം നടത്തിയതിന് നെടുംകുന്നം നെടുമണ്ണി ഭാഗത്ത്‌ ആലുങ്കൽ വീട്ടിൽ സുരേഷ് ജോണിനെയാണ് കറുകച്ചാൽ പോലീസ് ഇൻസ്‌പെക്ടർ പ്രശോഭ് കെ.കെയുടെ നേതൃത്വത്തിള്ള സംഘം അറസ്റ്റ് ചെയ്തത്. ഇയാളുടെ കടയിൽ ഹാൻസ് വിൽപ്പന നടക്കുന്നുണ്ടെന്ന വിവരം ലഭിച്ചതിനെ തുടർന്ന് പോലീസ് നിരീക്ഷണത്തിലായിരുന്നു ഇയാൾ. തുടർന്ന് ഇന്നലെ നടത്തിയ പരിശോധനയിൽ ഉപ്പുചാക്കിനിടയിൽ ഒളിപ്പിച്ച നിലയിൽ ഒരു പ്ലാസ്റ്റിക് ചാക്കിൽനിന്നും 165 പാക്കറ്റ് നിരോധിത പുകയില ഉൽപ്പന്നമായ ഹാൻസ് കണ്ടെത്തുകയായിരുന്നു. എസ്. ഐ. ജോൺസൺ ആന്റണി, എസ്.സി.പി.ഒമാരായ വിവേക് ചന്ദ്രൻ, ഡെന്നി ചെറിയാൻ, സിപിഒമാരായ ബ്രിജിത്, രതീഷ് കുമാർ എന്നിവരും പോലീസ് സംഘത്തിൽ ഉണ്ടായിരുന്നു.
