സോഫ്റ്റ്‌വെയർ തകരാറിനെത്തുടർന്ന് കാനഡയിൽ മൂവായിരത്തിലധികം വാഹനങ്ങൾ തിരിച്ചു വിളിച്ചതായി നിസ്സാൻ അറിയിച്ചു. ചില പ്രത്യേക ട്രിം ലെവലുകളെ മാത്രമേ തിരിച്ചുവിളിക്കുന്നത് ബാധിക്കുകയുള്ളൂവെന്ന് കമ്പനി പറയുന്നു. ഇൻഫിനിറ്റി ക്യുഎക്സ് 80 (2025, 2026); നിസ്സാൻ അർമാഡ (2025, 2026); നിസ്സാൻ മുരാനോ (2025) എന്നിവയാണ് ബാധിച്ച വാഹനങ്ങൾ. 3,700 വാഹനങ്ങളാണ് തിരിച്ചുവിളിയിൽ ഉൾപ്പെട്ടിരിക്കുന്നത്.

ചില വാഹനങ്ങളിൽ, സോഫ്റ്റ്‌വെയർ പ്രശ്‌നം കാരണം വാഹനം സ്റ്റാർട്ട് ചെയ്യുമ്പോൾ ഇൻഫോടെയ്ൻമെന്റ് സിസ്റ്റം ഡിസ്‌പ്ലേ ദൃശ്യമാകാതെ വരുമെന്ന് ട്രാൻസ്‌പോർട്ട് കാനഡ പറയുന്നു. ഇത് കാരണം വാഹനങ്ങൾ പിന്നോട്ട് എടുക്കുമ്പോൾ റിയർവ്യൂ ക്യാമറ ദൃശ്യങ്ങൾ തെളിയാതെ വരും. ഇത് അപകടസാധ്യത വർധിപ്പിക്കുമെന്നും ഏജൻസി അറിയിച്ചു. തിരിച്ചുവിളിച്ച വാഹനങ്ങളുടെ ഉടമകളെ കമ്പനി മെയിൽ വഴി ബന്ധപ്പെടും. ഇൻഫോടെയ്ൻമെന്റ് സിസ്റ്റം സോഫ്റ്റ്‌വെയർ അപ്‌ഡേറ്റ് ചെയ്യുന്നതിനായി ഉടമകൾ ഒരു ഡീലർഷിപ്പ് സന്ദർശിക്കാനും കമ്പനി നിർദ്ദേശിക്കും.