ഓസ്‌ട്രേലിയയിൽ നിന്നും അമേരിക്കയിലെ സാൻ ഫ്രാൻസിസ്കോയിലേക്ക് കയറ്റി അയച്ച അമേരിക്കയുടെ അത്യാധുനിക എഫ്-35 സ്റ്റെൽത്ത് യുദ്ധവിമാനത്തിന്റെ സുപ്രധാന ഭാഗങ്ങൾ അബദ്ധത്തിൽ ചൈനയിലെ ഹോങ്കോങ്ങിൽ എത്തിച്ചേർന്നത് പെന്റഗണിൽ വലിയ സുരക്ഷാ ആശങ്കകളാണ് സൃഷ്ടിച്ചിരിക്കുന്നത്. ദക്ഷിണ കൊറിയയും തായ്‌വാനും വഴി കടന്നുപോകേണ്ടിയിരുന്ന ഈ ഷിപ്പ്മെന്റ്, കയറ്റുമതി വൈകിയതിനെത്തുടർന്ന് ഡെലിവറി വേഗത്തിലാക്കാൻ ശ്രമിക്കുന്നതിനിടയിലാണ് അബദ്ധത്തിൽ ഹോങ്കോങ്ങിലേക്ക് വഴിതിരിച്ചുവിട്ടത്. അന്താരാഷ്ട്ര ആയുധ നിർമ്മാണ ചട്ടങ്ങൾ പ്രകാരം സെൻസിറ്റീവ് സാങ്കേതികവിദ്യകൾ ശത്രുരാജ്യങ്ങളുടെ കൈകളിൽ എത്താതിരിക്കാൻ കർശന നിയന്ത്രണങ്ങളുണ്ടെങ്കിലും, ഫ്രൈറ്റ് ഫോർവേഡർ ഫേം നൽകിയ മുന്നറിയിപ്പ് ഇമെയിൽ വ്യത്യസ്ത ഐടി സിസ്റ്റങ്ങളിലെ തകരാറ് കാരണം ഏജന്റിന്റെ ശ്രദ്ധയിൽപ്പെടാതെ പോയതാണ് ഈ ഗുരുതരമായ വീഴ്ചയ്ക്ക് കാരണം.
ഈ അശ്രദ്ധമൂലം ചൈനയുടെ കൈകളിൽ എത്തിച്ചേർന്നത് എഫ്-35 വിമാനത്തിന്റെ കോക്ക്പിറ്റ് കാനോപി, വെപ്പൺസ്-ബേ ഡോർ തുടങ്ങിയ നിർണായക ഭാഗങ്ങളാണ്. റഡാർ തരംഗങ്ങളെ ആഗിരണം ചെയ്ത് ശത്രുക്കളുടെ റഡാറുകളിൽ പെടാതെ ഒളിച്ചിരിക്കാൻ (Stealth capabilities) യുദ്ധവിമാനങ്ങളെ സഹായിക്കുന്ന ഏറ്റവും പ്രധാനപ്പെട്ട റഡാർ-അബ്‌സോർബിങ് മെറ്റീരിയൽ കോട്ട് ചെയ്തവയാണ് ഈ രണ്ട് ഭാഗങ്ങളും. വർഷങ്ങളായി എഫ്-35 വിവരങ്ങൾ ചോർത്താൻ ചാരവൃത്തി നടത്തിവരുന്ന ചൈനയ്ക്ക്, ഈ ഭാഗങ്ങൾ റീവേഴ്‌സ് എൻജിനീയറിങ് വഴി പഠിച്ച് അവയുടെ സാങ്കേതികവിദ്യ മനസ്സിലാക്കാനും ഭാവിയിൽ പ്രതിരോധ മാർഗ്ഗങ്ങൾ കണ്ടെത്താനും സാധിക്കുമെന്ന് ഗവൺമെന്റ് അക്കൗണ്ടബിലിറ്റി ഓഫീസ് ഉദ്യോഗസ്ഥർ മുന്നറിയിപ്പ് നൽകുന്നുണ്ട്.
ഈ ഗുരുതര വീഴ്ചയ്ക്ക് പിന്നാലെ പെന്റഗണും സ്റ്റേറ്റ് ഡിപ്പാർട്ട്‌മെന്റും ഔദ്യോഗിക അന്വേഷണം ആരംഭിച്ചിരിക്കുകയാണ്. ലഭിച്ച ഭാഗങ്ങൾ ഉപയോഗശൂന്യമാണെന്ന് പറഞ്ഞ് പെന്റഗൺ പ്രതിരോധിക്കാൻ ശ്രമിക്കുന്നുണ്ടെങ്കിലും, ആഗോള സൈനിക വിതരണ ശൃംഖല അടിയന്തരമായി പുനഃപരിശോധിക്കണമെന്നാണ് യു.എസ് കോൺഗ്രസ് അംഗങ്ങളുടെ ശക്തമായ ആവശ്യം.
