കാനഡയിലെ ആദ്യ അതിവേഗ റെയിൽ പദ്ധതിയുടെ നിർമ്മാണം വേഗത്തിലാക്കാൻ ഫെഡറൽ സർക്കാർ നടപടി സ്വീകരിക്കുമെന്ന് പ്രധാനമന്ത്രി മാർക്ക് കാർണി പ്രഖ്യാപിച്ചു. നിർമ്മാണം ആരംഭിക്കുന്നതിനായി പദ്ധതിയുടെ എഞ്ചിനീയറിങ് , നിയന്ത്രണ, പെർമിറ്റിങ് ജോലികൾ സർക്കാർ വേഗത്തിലാക്കും. ടൊറൻ്റോയെയും ക്യൂബെക്ക് സിറ്റിയെയും ബന്ധിപ്പിക്കുന്ന ആൾട്ടോ അതിവേഗ റെയിൽ പദ്ധതി യുമായി ബന്ധപ്പെട്ട നടപടികൾ പുരോഗമിക്കുകയാണെന്നും അദ്ദേഹം അറിയിച്ചു. നിലവിലെ ഗതാഗതക്കുരുക്കിന് ഒരു പരിഹാരമാവുന്നതിനൊപ്പം, യാത്രയുടെ സമയം ഗണ്യമായി കുറയ്ക്കാൻ റെയിൽവെ പദ്ധതി സഹായിക്കും.
പദ്ധതി രാജ്യത്തിൻറെ സാമ്പത്തിക വളർച്ചയ്ക്കും, കൂടുതൽ തൊഴിലവസരങ്ങൾ സൃഷ്ടിക്കുന്നതിനും, പരിസ്ഥിതി സൗഹൃദപരമായ ഒരു യാത്രാമാർഗ്ഗം ഉറപ്പാക്കുന്നതിനും സഹായകമാകും. കൂടാതെ പദ്ധതി പൂർത്തിയാകുന്നതോടെ, യാത്രക്കാർക്ക് സുഖകരവും വേഗമേറിയതുമായ യാത്രാനുഭവം ലഭിക്കും. നിർമ്മാണ പ്രവർത്തനങ്ങൾ വേഗത്തിലാക്കുന്നതിലൂടെ, നിശ്ചിത സമയപരിധിക്കുള്ളിൽ പദ്ധതി പൂർത്തിയാക്കാനാകുമെന്ന ആത്മവിശ്വാസത്തിലാണ് അധികൃതർ. പദ്ധതിയുടെ പുരോഗതിയും, അതിൻ്റെ പാരിസ്ഥിതികവും സാമൂഹികവുമായ സ്വാധീനങ്ങളും അധികൃതർ സൂക്ഷ്മമായി വിലയിരുത്തുന്നുണ്ട്. ആൾട്ടോ ഹൈ സ്പീഡ് റെയിൽ യാഥാർത്ഥ്യമാകുന്നതോടെ, പൊതുഗതാഗത രംഗത്ത് വലിയ മാറ്റങ്ങൾ വരുമെന്നാണ് പ്രതീക്ഷ.
