വേൾഡ് മലയാളി കൗൺസിലിന്റെ 15-ാമത് ആഗോള സമ്മേളനത്തിനും 30-ാം വാർഷിക ആഘോഷങ്ങൾക്കും അമേരിക്കയിലെ ഡാളസിൽ ഗംഭീര തുടക്കമായി. കോട്ടയം എം.പി ഫ്രാൻസിസ് ജോർജ് പരിപാടി ഭദ്രദീപം കൊളുത്തി ഉദ്ഘാടനം ചെയ്തു. പ്രവാസി മലയാളികളുടെ കൂട്ടായ്മയും സാംസ്കാരിക പാരമ്പര്യവും കാത്തുസൂക്ഷിക്കുന്നതിൽ സംഘടന വഹിക്കുന്ന പങ്ക് എടുത്തുപറയേണ്ടതാണെന്ന് അദ്ദേഹം ഉദ്ഘാടന പ്രസംഗത്തിൽ വ്യക്തമാക്കി. തുടർന്ന് ഗ്ലോബൽ ചെയർമാൻ ഗോപാലപിള്ള, ഗ്ലോബൽ പ്രസിഡന്റ് ജോൺ മത്തായി, കൺവീനർ ജോൺസൺ തലച്ചെല്ലൂർ എന്നിവർ ചേർന്ന് പതാകയുയർത്തി. ലോകത്തിന്റെ വിവിധ ഭാഗങ്ങളിൽ നിന്നുള്ള പ്രതിനിധികൾ അണിനിരന്ന സാംസ്കാരിക ഘോഷയാത്രയും വിളംബര റാലിയും ചടങ്ങിന് മാറ്റുകൂട്ടി. ഹൂസ്റ്റൺ 5th ഡിസ്ട്രിക്റ്റ് കോർട്ട് ജഡ്ജി സുരേന്ദ്രൻ പട്ടേൽ ചടങ്ങിൽ മുഖ്യപ്രഭാഷണം നടത്തി.
സമ്മേളനത്തിൽ വെച്ച് പ്രധാന പുരസ്കാരങ്ങളും വിതരണം ചെയ്തു. ജീവകാരുണ്യ പ്രവർത്തനങ്ങൾക്കുള്ള ഡോ. പി. എ. ഇബ്രാഹിം ഹാജി മെമ്മോറിയൽ ഹ്യൂമാനിറ്റേറിയൻ ഗോൾഡൻ ലാന്റേൺ അവാർഡ് പത്തനാപുരം ഗാന്ധിഭവൻ മാനേജിംഗ് ട്രസ്റ്റി ഡോ. പുനലൂർ സോമരാജന് വേണ്ടി നൈനാൻ മത്തായി എം.പി ഫ്രാൻസിസ് ജോർജിൽ നിന്ന് ഏറ്റുവാങ്ങി. ബിസിനസ് എക്സലൻസ് അവാർഡ് ‘എൻകോൺസ്’ സി.ഇ.ഒ മോബി കെ. ബാബുവിന് ജഡ്ജി സുരേന്ദ്രൻ പട്ടേൽ സമ്മാനിച്ചു. ചടങ്ങിൽ പ്രത്യേക സ്മരണികയുടെ പ്രകാശനവും നടന്നു. ക്രിസ്റ്റഫർ വർഗീസ്, പിന്റോ കണ്ണമ്പള്ളി, ആൻസി തലച്ചെല്ലൂർ, അഡ്വ. കെ. വി. സാബു, രാജേഷ് പിള്ള തുടങ്ങിയ പ്രമുഖ സംഘടന നേതാക്കൾ ആശംസകൾ നേർന്നു.
തുടർന്ന് റോയൽ ഡാൻസ് സ്റ്റുഡിയോയുടെ ഡബ്ള്യൂഎംസി തീം ഡാൻസ്, നോർത്ത് ടെക്സസ് പ്രൊവിൻസിന്റെ സ്വാഗതാഞ്ജലി നൃത്തം, കവിതാലാപനം, വിവിദ നൃത്തങ്ങൾ, ഗാനമേള തുടങ്ങിയ വൈവിധ്യമാർന്ന സാംസ്കാരിക പരിപാടികളും വേദിയിൽ അരങ്ങേറി. നാലു ദിവസം നീണ്ടുനിൽക്കുന്ന ഈ ആഗോള മാമാങ്കം തിങ്കളാഴ്ചയോടെ സമാപിക്കും.
