ന്യൂഡൽഹി: മൂന്നാമത് ഇന്ത്യ-നോർഡിക് ഉച്ചകോടിയുടെ തീരുമാനങ്ങൾ വിദേശകാര്യ മന്ത്രാലയം പങ്കുവെച്ചു. ഉച്ചകോടിയിൽ പ്രധാനമന്ത്രി നരേന്ദ്ര മോദിയുടെ പങ്കാളിത്തം വഴി എട്ട് പ്രധാന തീരുമാനങ്ങളാണ് ഉണ്ടായത്. നോർഡിക് രാജ്യങ്ങളുമായുള്ള ഇന്ത്യയുടെ തന്ത്രപ്രധാനവും സാമ്പത്തികവും സാങ്കേതികവുമായ സഹകരണം കൂടുതൽ ശക്തമാക്കുകയാണ് ഇതിലൂടെ ലക്ഷ്യമിടുന്നത്. ഹരിത വികസനം (green growth), നവീകരണം, പ്രതിരോധം, കാലാവസ്ഥാ സഹകരണം എന്നിവയ്ക്കാണ് ഇതിൽ പ്രധാന ഊന്നൽ നൽകിയിരിക്കുന്നത്.
നോർഡിക് മേഖലയിലെ നേതാക്കൾ പങ്കെടുത്ത ഈ ഉച്ചകോടി, ശുദ്ധമായ ഊർജ്ജം, ആർട്ടിക് ഗവേഷണം എന്നിവ മുതൽ വിദഗ്ധ തൊഴിലാളികളുടെ കൈമാറ്റം (talent mobility), സമുദ്ര സുരക്ഷ വരെയുള്ള മേഖലകളിൽ സഹകരണം വ്യാപിപ്പിക്കാൻ ലക്ഷ്യമിടുന്നു.
ഇന്ത്യ-നോർഡിക് ബന്ധം തന്ത്രപ്രധാന ഹരിത പങ്കാളിത്തത്തിലേക്ക്
ഇന്ത്യയും നോർഡിക് രാജ്യങ്ങളും തമ്മിലുള്ള ബന്ധം ‘ഗ്രീൻ ടെക്നോളജി ആൻഡ് ഇന്നൊവേഷൻ സ്ട്രാറ്റജിക് പാർട്ണർഷിപ്പ്’ (Green Technology and Innovation Strategic Partnership) എന്ന നിലയിലേക്ക് ഉയർത്തി. ഭാവി മുന്നിൽ കണ്ടുള്ള മേഖലകളിൽ ദീർഘകാല സഹകരണത്തിലേക്കുള്ള ചുവടുവെപ്പാണ് ഇത് സൂചിപ്പിക്കുന്നത്.
ബ്ലൂ ഇക്കോണമി (സമുദ്രവിഭവങ്ങളുടെ സുസ്ഥിര ഉപയോഗം), സർക്കുലർ ഇക്കോണമി (വിഭവങ്ങളുടെ പുനരുപയോഗം), ഡിജിറ്റൽ ഇൻഫ്രാസ്ട്രക്ചർ എന്നീ മേഖലകളിലെ സഹകരണം കൂടുതൽ ശക്തമാക്കാൻ ഈ പങ്കാളിത്തം വഴി സാധിക്കും. അതോടൊപ്പം തന്നെ കാലാവസ്ഥാ വ്യതിയാനം, ഊർജ്ജ സുരക്ഷ, ജല മാനേജ്മെന്റ്, വിദ്യാഭ്യാസം എന്നിവയിലെ സംയുക്ത പ്രവർത്തനങ്ങൾ വിപുലീകരിക്കാനും ഇത് ലക്ഷ്യമിടുന്നു.
ഇന്ത്യ-ഇ.യു, ഇ.എഫ്.ടി.എ കരാറുകളിലൂടെ വ്യാപാര മുന്നേറ്റം
നിർദ്ദിഷ്ട ഇന്ത്യ-ഇ.യു (ഇന്ത്യ-യൂറോപ്യൻ യൂണിയൻ) സ്വതന്ത്ര വ്യാപാര കരാറിലൂടെയും, ഇന്ത്യ-ഇ.എഫ്.ടി.എ (EFTA) വ്യാപാര-സാമ്പത്തിക പങ്കാളിത്ത കരാറിലൂടെയും സാമ്പത്തിക കൂട്ടായ്മ ശക്തിപ്പെടുത്തുന്നതിന് ഉച്ചകോടി വലിയ പ്രാധാന്യം നൽകി.
വ്യാപാര-നിക്ഷേപ മേഖലകളിലെ ആഴത്തിലുള്ള ബന്ധം വിതരണ ശൃംഖലയെ (supply chain) കൂടുതൽ സുരക്ഷിതമാക്കുമെന്നും, സുസ്ഥിരമായ വളർച്ചയ്ക്ക് വേഗത കൂട്ടുമെന്നും, പുതിയ ബിസിനസ്സ് അവസരങ്ങൾ സൃഷ്ടിക്കുമെന്നും നേതാക്കൾ പറഞ്ഞു. ഇ.എഫ്.ടി.എ (EFTA) രാജ്യങ്ങൾ ഇന്ത്യയിൽ 100 ബില്യൺ യു.എസ് ഡോളർ നിക്ഷേപിക്കുമെന്നാണ് പ്രതീക്ഷിക്കുന്നത്. ഇത് ഉൽപ്പാദനം, നവീകരണം, തൊഴിലവസരങ്ങൾ എന്നിവ വർദ്ധിപ്പിക്കാൻ സഹായിക്കും.
